Իշխանություններ․ հարվածներից հետո Ղրիմի քաղաքներում էլեկտրաէներգիայի անջատումներ են մտցվել

Բռնակցված Ղրիմում Կրեմլի նշանակած իշխանությունները հայտնել են, որ նոյեմբերի 3-ի լույս գիշերն էլեկտրացանցի վրա ուկրաինական հարձակումներից հետո առնվազն 5 քաղաքում ստիպված են եղել էլեկտրաէներգիայի վթարային անջատումներ մտցնել։ Սահմանափակումները վերաբերել են Սևաստոպոլին, Ալուշտային, Սակիին, Եվպատորիային և Կերչին։

Սևաստոպոլում անջատումներից առաջ սահմանափակումները կարճ ժամանակով վերացվել էին․ նոյեմբերի 2-ի ուշ երեկոյան կարգավարները հրահանգել էին կրկին միացնել բոլոր սպառողներին, սակայն գիշերային հարձակումից հետո սահմանափակումները վերադարձվել են։

Ռուսաստանի նշանակած նահանգապետի խոսքով՝ Սևաստոպոլում չեն կարողանում պահպանել նախկին գրաֆիկը

Սևաստոպոլն իր էլեկտրաէներգիայի մեծ մասը ստանում է քաղաքից դուրս գտնվող աղբյուրներից։ Ռուսաստանի նշանակած նահանգապետ Միխայիլ Ռազվոժաևն ասել է, որ գիշերը քաղաքի սահմաններից դուրս գտնվող էներգետիկ ենթակառուցվածքը կրկին հարձակման է ենթարկվել, իսկ ստացվող էլեկտրաէներգիան բավարար չէ նախկին գրաֆիկը պահպանելու համար, որով 2 ժամ հոսանք էր տրվում, ապա 6 ժամ անջատվում։

Krymenergo էլեկտրամատակարար ընկերությունը հայտնել է, որ հոսանքազրկվել են նաև մի շարք բնակավայրերի, այդ թվում՝ Սակիի, Ալուշտայի, Եվպատորիայի և Ֆեոդոսիայի սպառողները։ Ալուշտայում հասանելի հզորության նվազման պատճառով հովհարային անջատումներ են մտցվել, իսկ Եվպատորիայում էլեկտրաէներգիայի ընդհատումների հետևանքով ջրի ճնշումը նվազել է, գրել է The Insider-ը։

Հոկտեմբերի 24-ին Սևաստոպոլից դուրս գտնվող էներգետիկ ենթակառուցվածքի վրա հարձակումից հետո քաղաքի զգալի մասն արդեն մնացել էր առանց հոսանքի։ Ռազվոժաևն այդ երեկո հայտնել էր, որ քաղաքի մոտ 40%-ը էլեկտրաէներգիա է ստանում, իսկ մյուս սպառողները հերթով են միացվում։ Հոկտեմբերի 25-ին էլեկտրամատակարարումը ժամանակավորապես վերականգնելուց հետո ցանցը կրկին գերբեռնվել էր․ իշխանությունները 3 ժամ հոսանքով, 3 ժամ առանց հոսանքի գրաֆիկ էին մտցրել, իսկ հոկտեմբերի 27-ին վերադարձել էին 2 ժամ հոսանքով և 6 ժամ առանց հոսանքի ռեժիմին։