Կոլումբիայում ձերբակալվել է ԱՄՆ-ում 9 կետով մեղադրվող մեքսիկացի դատավորը

Մեքսիկացի դատավոր Լուիս Բենիտես Ալկանտարան կիրակի ձերբակալվել է Կոլումբիայում։ Նրան ԱՄՆ-ում մեղադրանք է առաջադրվել հանցագործությունից հետո աջակցություն ցուցաբերելու 9 կետով, նոյեմբերի 5-ին հայտարարել է ԱՄՆ-ի արդարադատության նախարարությունը։ ԱՄՆ-ը կպահանջի նրա արտահանձնումը։

Մեղադրական եզրակացության համաձայն՝ Բենիտեսը $2 միլիոն կաշառք է ստացել 2025 թ․ փետրվարի 24-ին՝ այն օրը, երբ կանադացի մեղադրյալ Էնդրյու Քլարքի համար գրավ է սահմանել և կարգադրել ազատ արձակել նրան։ ԱՄՆ-ում առաջադրված մեղադրանքներով Քլարքի ձերբակալությունից հետո նրա արտահանձնման գործընթացը վերահսկում էր Մեխիկոյի շրջանային դատավոր Բենիտեսը։

Հետաքննությունների դաշնային բյուրոյի տնօրեն Քաշ Փաթելն ասել է, որ Բենիտեսը, ըստ մեղադրանքի, կաշառքներ է ընդունել և իր դատավորի պաշտոնն օգտագործել Ուեդինգին ու նրա համախոհներին օգնելու համար։ Փաթելն ասել է, որ մեղադրանքները վերաբերում են անձի ենթադրյալ աջակցությանը, որի նպատակը մեկ այլ անձի ձերբակալությունը, դատաքննությունը կամ պատիժը խոչընդոտելը կամ կանխելն էր։ Մեղավոր ճանաչվելու դեպքում Բենիտեսին յուրաքանչյուր կետով սպառնում է առավելագույնը 15 տարվա ազատազրկում, հայտնել է նախարարությունը։

Մեղադրական եզրակացությունը պարունակում է մեղադրանքներ, ոչ թե մեղավորության մասին դատարանի եզրահանգումներ։ Արդարադատության նախարարության համաձայն՝ բոլոր մեղադրյալները համարվում են անմեղ, քանի դեռ նրանց մեղավորությունը դատարանում չի ապացուցվել ողջամիտ կասկածից վեր։

Ենթադրյալ վճարումն ու ազատ արձակումը

Քլարքը Մեքսիկայում ձերբակալվել էր 2024 թվականի հոկտեմբերին՝ թմրամիջոցների ապօրինի շրջանառության, սպանության և սպանության փորձի համար ԱՄՆ-ում առաջադրված մեղադրանքներով։ Նույն գործով անցնում էր նաև կանադացի նախկին օլիմպիական սնոուբորդիստ Ռայան Ջեյմս Ուեդինգը։ ԱՄՆ-ը Քլարքի արտահանձնումը պաշտոնապես պահանջել էր 2024 թվականի նոյեմբերին։ Արդարադատության նախարարությունը պնդում է, որ Քլարքն Ուեդինգի թմրամիջոցների ապօրինի շրջանառության ցանցում երկրորդ դեմքն էր։

Մեղադրական եզրակացության համաձայն՝ 2024 թվականի նոյեմբերից մինչև 2025 թվականի փետրվարը Քլարքը միջնորդների միջոցով փոքր մասերով փոխանցել է մոտ $2,75 միլիոն՝ իր ազատ արձակումն ապահովելու համար, և բանակցությունների արդյունքում համաձայնություն է ձեռք բերել Բենիտեսին վճարելու շուրջ։ Ազատ արձակվելուց օրեր անց Քլարքը կրկին ձերբակալվել է և 2025 թ․ փետրվարի 27-ին հանձնվել ԱՄՆ իշխանություններին, հայտնում է Fox News-ը։ ԱՄՆ-ում նրա դեմ քրեական գործը դեռ քննվում է։