ԱՄՆ դատավորը մերժել է Յուտայի ընտրողների տվյալները ստանալու՝ արդարադատության նախարարության հայցը

ԱՄՆ դաշնային շրջանային դատարանի դատավոր Դեյվիդ Բարլոուն ուրբաթ մերժել է արդարադատության նախարարության հայցը, որով պահանջվում էր Յուտայի ընտրողների ամբողջական ցուցակը՝ չընդունելով այդ հայցի հիմքով տվյալների տրամադրումը պարտադրելու փորձը։ Վճռի մասին հոկտեմբերի 26-ին գրել է Fox News-ը։

Տվյալների բազան ստանալու համար նախարարությունը դատի էր տվել Յուտայի փոխնահանգապետ Դիդրա Հենդերսոնին՝ նահանգի ընտրությունների հարցերով գլխավոր պաշտոնյային։ Այն պահանջել էր ընտրողների անունները, ծննդյան ամսաթվերն ու հասցեները, ինչպես նաև վարորդական վկայականների համարները կամ սոցիալական ապահովության համարների վերջին չորս թվանշանները։

Բարլոուն հայցը մերժել է՝ նույն պահանջով կրկին դիմելու իրավունքը բացառելով։ Սա նշանակում է, որ նախարարությունը չի կարող պարզապես նորից ներկայացնել նույն հայցը, սակայն կարող է վերադաս դատարանից խնդրել բեկանել վճիռը։

Ինչու էր կարևոր օրենքի ձևակերպումը

Նախարարությունն իր պահանջը հիմնավորել էր 1960 թվականի քաղաքացիական իրավունքների մասին օրենքով։ Դաշնային կառավարության իրավաբանները պնդել էին, որ օրենքը Հենդերսոնին պարտավորեցնում է դաշնային ստուգման համար հասանելի դարձնել ընտրություններին առնչվող որոշ փաստաթղթեր, որոնք «անցնում են» նրա տիրապետության տակ։

Բարլոուն վկայակոչել է ԱՄՆ վեցերորդ դատական շրջանի վերաքննիչ դատարանի որոշումը, որը տարբերակում էր փաստաթղթերը ստանալն ու ստեղծելը։ Դատարանի հիմնավորումն այն էր, որ սովորական անգլախոսը չի ասի, թե որևէ մեկի տիրապետության տակ է անցել մի բան, որն այդ մարդն ինքն է ստեղծել, ձևավորել և պահպանել։ Բարլոուն այս տարբերակումը կիրառել է նախարարության պահանջած համանահանգային տվյալների բազայի նկատմամբ։

Նախարարությունը նաև պնդել էր, որ տվյալների հասանելիությունը բխում է օրենքի նպատակից․ այն դաշնային ընտրական օրենքների կիրարկման գործիք է, իսկ նահանգները գրանցման տվյալների բազաներն օգտագործում են ընտրացուցակները վարելու համար։ Բարլոուն մերժել է այդ փաստարկը՝ ասելով, որ օրենքի ավելի լայն նպատակը չի կարող գերակա լինել դրա ձևակերպման նկատմամբ։