Վիետնամը 2027 թ․ հունվարի 1-ից թարմացնում է օգտագործված էլեկտրոնիկայի ներմուծման արգելքը

Վիետնամի գիտության և տեխնոլոգիաների նախարարությունը 2026 թ․ հոկտեմբերի 27-ին ընդունել է թիվ 63 շրջաբերականը, որով սահմանվում է 2027 թ․ հունվարի 1-ից ներմուծման համար արգելված օգտագործված թվային տեխնոլոգիական արտադրանքի թարմացված ցանկը։ Այն ներառում է համակարգիչներ ու սմարթֆոններ, ինչպես նաև լարային կամ անլար ցանցերով ձայն, պատկեր կամ տվյալներ ուղարկող կամ ստացող սարքավորումներ։

VnExpress International-ը գրել է, որ ցանկում պահպանվել են տեղեկատվության և հաղորդակցության նախկին նախարարության 2018 թվականի կանոններով ընդգրկված սարքերի բազմաթիվ խմբեր, սակայն սմարթֆոններն ավելի հստակ են նկարագրված։ Նախկին կանոններով նույնպես արգելված էին վերականգնված սարքերն ու օգտագործված մասերը, իսկ մեծաչափ և արագագործ սև-սպիտակ տպիչների ու պատճենահանող սարքերի համար բացառություններ էին նախատեսված։

Ընդգրկված սարքերն ու մասերը

Ցանկում ընդգրկված են խոսափողեր, բարձրախոսներ, ականջակալներ, թվային և հեռուստատեսային տեսախցիկներ, ռադիոյի և հեռուստատեսության հեռարձակման ու ընդունման սարքավորումներ, ռադարներ, նավիգացիոն սարքեր և ռադիոալիքներով աշխատող հեռակառավարման վահանակներ։ Այն ներառում է նաև մոնիտորներ և պրոյեկտորներ։

Ցանկում նշված բաղադրիչներն ու նյութերը ներառում են տպագիր և ինտեգրալ սխեմաներ, էլեկտրոնային լամպեր, էլեկտրական լարեր ու մալուխներ, օպտիկամանրաթելային, հեռախոսային և հեռագրային մալուխներ։ Արգելվում են նաև ցանկում ընդգրկված արտադրանքի օգտագործված մասերը, պարագաները, բաղադրիչների հանգույցներն ու էլեկտրոնային բաղադրիչները։

Վերականգնված թվային տեխնոլոգիական արտադրանքի ներմուծումն արգելվում է, եթե դրա՝ ապրանքների նկարագրության և ծածկագրման ներդաշնակեցված համակարգի (HS) ծածկագրերը նշված են ցանկում։ Շրջաբերականում դրանք սահմանվում են որպես օգտագործված ապրանքներ, որոնք նորին համարժեք գործառույթը, որակն ու արտաքին տեսքը վերականգնելու համար նորոգվել են կամ որոնց մասերը փոխարինվել են։ HS ծածկագրերն օգտագործվում են ապրանքների մաքսային դասակարգման համար։