Նահանգապետ․ Ռուսաստանի Վոլգոգրադում անօդաչուի հարվածից 4 մարդ է զոհվել

Նոյեմբերի 13-ի գիշերը Ռուսաստանի հարավում գտնվող Վոլգոգրադի արդյունաբերական գոտուն ուկրաինական անօդաչուի հարվածից 4 մարդ է զոհվել, ևս 2-ը՝ վիրավորվել, ասել է մարզի նահանգապետ Անդրեյ Բոչարովը։ Նրա խոսքով՝ զոհվածներն ու վիրավորները քաղաքի հարավային արդյունաբերական գոտու աշխատակիցներ են։

Բոչարովն ավելի վաղ ասել էր, որ անօդաչուների բեկորների անկումը տեղային հրդեհներ է առաջացրել արդյունաբերական գոտում և դրա շրջակայքում, սակայն տուժածներ չկան։

Վտարանդի Astra լրատվամիջոցը, վերլուծելով ականատեսների լուսանկարները, պարզել է, որ հարվածի ենթարկված օբյեկտը Lukoil-ի նավթավերամշակման գործարանն է, գրել է The Moscow Times-ը։ Սոցիալական ցանցերում հրապարակված չստուգված տեսանյութում, ըստ Al Jazeera-ի, իբր երևում էր Վոլգոգրադի խոշոր նավթավերամշակման գործարանի հրդեհը։ Գործարանի վրա հարձակման մասին անմիջական պաշտոնական հաստատում չի եղել։

Բացի այդ՝ Ռուսաստանի պաշտպանության նախարարությունը հայտնել է, որ գիշերվա ընթացքում Ռուսաստանի մարզերի և բռնակցված Ղրիմի երկնքում կասեցրել է ուկրաինական 1 198 անօդաչու։ Այդ թիվը միայն Վոլգոգրադին չի վերաբերում։

Հարձակումները տեղի են ունեցել այն ժամանակ, երբ ռուս և ուկրաինացի բանակցողները հայտնել են Աբու Դաբիում կայացած բանակցություններում գերիների լայնածավալ փոխանակման շուրջ համաձայնության մասին, սակայն պատերազմի ավարտին ուղղված առաջընթաց չի գրանցվել։ Սպասվում էր, որ Ռուսաստանն ու Ուկրաինան հաջորդ շաբաթ կվերսկսեն բանակցությունները։