Ուելսի հրշեջերն ահազանգում են վնասվածքների ու բնական հրդեհներին արձագանքելու միջոցների պակասի մասին

Արհմիությունը մատնանշում է հանդերձանքի և անձնակազմի պակասը

Հրշեջների արհմիության փոխանցմամբ՝ խմբերը բլուրներ էին բարձրանում անհամապատասխան կոշիկներով ու շենքերի հրդեհները մարելու համար նախատեսված, օդ չանցկացնող հագուստով, քանի որ բնական հրդեհների համար անհրաժեշտ հանդերձանքը չէր բավարարում։ Արհմիության գործադիր խորհրդում Ուելսի ներկայացուցիչ Գարեթ Թովին պնդել է, որ վնասվածքների պատճառը համապատասխան հանդերձանքի բացակայությունն էր։

Թովին հայտնել է, որ մասնագիտացված խմբերը, այդ թվում՝ ջրային փրկարարական խմբերը, ուղարկվել էին բնական հրդեհները մարելու, ինչի հետևանքով որոշ փուլերում Հարավային Ուելսի ընդարձակ տարածքներ մնացել էին առանց պահեստային խմբերի։ Արհմիության գնահատմամբ՝ ամբողջ Ուելսում պակասում է 400 հրշեջ։

Բացի այդ՝ BBC-ի փոխանցմամբ՝ Մեծ Բրիտանիայի խորհրդարանի շրջակա միջավայրի, պարենի և գյուղական հարցերի հանձնաժողովը եզրակացրել է, որ հրդեհները բացահայտել են երկրի պատրաստվածության թույլ կողմերը, իսկ հրշեջերը ստիպված են եղել աշխատել ծայրահեղ պայմաններում։ Խորհրդարանական հանձնաժողովը կոչ է արել Մեծ Բրիտանիայի կառավարության ֆինանսավորմամբ կանխարգելման արշավ անցկացնել և եղանակի կանխատեսումներում ներառել բնական հրդեհների վտանգի ցուցանիշներ։

Ֆինանսավորման պատասխանատվությունը և ներդրումների քննարկումները

Ինչպես բացատրում է BBC-ն, հրշեջ ծառայությունները հանրային ֆինանսավորում են ստանում տեղական իշխանությունների սահմանած վճարների միջոցով՝ տեղական խորհուրդների բյուջեների շրջանակում, որոնք սահմանում է Ուելսի կառավարությունը։ Ուելսի կառավարությունը հայտնել է, որ հրշեջ ծառայությունների հիմնական ֆինանսավորումն ինքը չի տրամադրում․ հրշեջ-փրկարար առանձին մարմիններն են որոշում անձնակազմի անհրաժեշտ թվաքանակն ու սահմանում իրենց բյուջեները։ Կառավարության խոսքով՝ այդ մարմինները պետք է հաշվի առնեն ամառային բնական հրդեհները։

Մերթիր Թիդվիլում կլիմայի փոփոխության և դիմակայունության հարցերով գագաթնաժողովի ժամանակ Ուելսի առաջին նախարար Ռին ապ Յորվերթը հայտարարել է, որ երկրին անհրաժեշտ են թե՛ կանխարգելիչ միջոցառումներ, թե՛ արձագանքելու կարողություններ։ Նա չի հաստատել լրացուցիչ ֆինանսավորման հատկացումը՝ վկայակոչելով ֆինանսական դժվարությունները։

Հարավային Ուելսի հրշեջ-փրկարար ծառայությունը բարձր է գնահատել անձնակազմի արձագանքը և հայտնել, որ կլիմայի փոփոխվող ռիսկերը պահանջում են շարունակել հարմարվել ու ամրապնդել կարողությունները՝ արձագանքելու այն իրավիճակներին, երբ ծառայության կարիքը կտրուկ աճում է։ Ծառայության փոխանցմամբ՝ անհրաժեշտ ներդրումները քննարկվում են արհմիությունների հետ։

Հյուսիսային Ուելսի հրշեջ-փրկարար ծառայությունը դիմում էր Ուելսի կառավարության արտակարգ օգնության ծրագրին՝ բնական հրդեհների պատճառով առաջացած լրացուցիչ ծախսերը ծածկելու համար։ Ակնկալվում էր, որ այդ ծախսերը կգերազանցեն 500 000 ֆունտը, իսկ ամբողջական ֆինանսական ազդեցությունը դեռ գնահատվում էր։