Պարենի համաշխարհային ծրագիր․ Սուդանում կրճատումներից 900 000-ը կորցրել է սննդօգնությունը

Սուդանում, գնահատմամբ, 900 000 խոցելի մարդ զրկվել է պարենային օգնությունից, քանի որ ֆինանսավորման կրճատումը ստիպում է Պարենի համաշխարհային ծրագրին կրճատել իր գործունեության ծավալը։ Օգոստոսին կառույցն օգնում էր ավելի քան չորս միլիոն մարդու, իսկ այժմ՝ երեք միլիոնից մի փոքր ավելի մարդու։

Ծրագրի տեղեկացմամբ՝ օգնության կրճատումը սկսվել է հոկտեմբերին և նախատեսվում է շարունակել մինչև 2026 թվականի ավարտը։ Օգնությունից զրկվողների թվում, գնահատմամբ, 500 000 փախստական կա։ Օգնություն ստանալ շարունակող ընտանիքների մեծ մասի պարենաբաժինները բավարարում են սննդի նվազագույն կարիքների միայն 50 տոկոսը։

Հակամարտությունն ու ֆինանսավորման պակասը խոչընդոտում են օգնությանը

Սուդանի քաղաքացիական պատերազմը սկսվել է 2023 թվականին և միլիոնավոր մարդկանց տեղահանության պատճառ դարձել։ Պարենի համաշխարհային ծրագրի տեղեկացմամբ՝ հակամարտությունից տուժած տարածքներում տեղահանությունը, բռնությունն ու տեղաշարժի սահմանափակումները խաթարում են մարդկանց ապրուստի միջոցներն ու սննդի հասանելիությունը։ Բացի ֆինանսավորման պակասից, օգնության առաքմանը խոչընդոտում են անվտանգության խնդիրները, փակ ճանապարհներն ու ջրհեղեղների պատճառած վնասները։

Սուդան կատարած իր առաջին աշխատանքային այցից հետո Պարենի համաշխարհային ծրագրի նոր գործադիր տնօրեն Լյուկ Լինդբերգը նախազգուշացրել է, որ ֆինանսավորման կրճատումը խորացնում է սովի ճգնաժամը։ Նա հանդիպել է տեղահանված ընտանիքների, որոնք դժվարանում են կերակրել իրենց երեխաներին, հայտնել է UN News-ը։

Պարենի համաշխարհային ծրագրին շտապ անհրաժեշտ է $520 միլիոն՝ մինչև 2027 թվականի ապրիլը 5,4 միլիոն մարդու պարենի և սնուցման աջակցություն տրամադրելու համար։ Լինդբերգը կոչ է արել դադարեցնել մարտերը և մեծացնել միջազգային աջակցությունը՝ ասելով, որ համատեղ գործողություններն ու լրացուցիչ միջոցները կարող են շրջել ճգնաժամի ընթացքը, իսկ կառույցի տեղում գործող թիմերը պատրաստ են լրացուցիչ միջոցների առկայության դեպքում ընդլայնել օգնությունը։