MachineGames-ը հաստատել է Wolfenstein 3-ի մշակումը

Xbox-ի գլխավոր տնօրեն Աշա Շարման և շվեդական MachineGames ստուդիան 2026 թ․ նոյեմբերի 12-ին Սիեթլում անցկացվող Xbox FanFest-ի ժամանակ հաստատել են, որ Wolfenstein 3-ը մշակման փուլում է։ Այն առաջին դեմքով հրաձգային խաղերի շարքի առաջին հիմնական խաղը կլինի 2017-ի Wolfenstein II: The New Colossus-ից հետո։

MachineGames-ը դերասանների վերադարձը հաստատել է իր շարժումների գրանցման ստուդիայում արված Բլումի և Ուիլսոնի լուսանկարով, գրել է IGN-ը։ Շարմայի հայտարարության մեջ երևացել է նաև խաղի սցենարի մեկ էջը։ Արձագանքելով նրա գրառմանը՝ MachineGames-ը գրել է․ «Նրա համբավն իրենից առաջ է անցնում»՝ նկատի ունենալով էջում նկարագրված գործողությունը։

Նախատեսված եռագրությունը

MachineGames-ը 2014-ին ստեղծել է Wolfenstein: The New Order-ը, ապա՝ դրա շարունակությունը՝ The New Colossus-ը։ Այնուհետև ստուդիան դադարեցրել է շարքի վրա աշխատանքը՝ ստեղծելու Indiana Jones and the Great Circle-ը, որը թողարկվել է 2024-ին։

Ստուդիայի ղեկավար Յերկ Գուստաֆսոնը 2025-ին Noclip-ին տված հարցազրույցում ասել է, որ թիմը միշտ էլ Բլասկովիչի պատմությունը պատկերացրել է որպես եռագրություն։ Նրա խոսքով՝ դեռ The New Order-ը պլանավորելիս թիմը որոշել էր, թե ինչ է տեղի ունենալու հերոսի հետ երկրորդ և երրորդ խաղերում։

Շարման ասել է, որ անհամբեր սպասում է նոր մանրամասներով կիսվելուն։ Xbox-ը չի հայտարարել խաղի թողարկման ամսաթիվ կամ ժամանակահատված, չի հայտնել, թե ինչ հարթակներում այն հասանելի կլինի կամ երբ կհրապարակի նոր մանրամասներ։