Դավիթ Հարությունյանն ընտրվել է Եղեգնաձոր համայնքի ղեկավար

«Հանրապետություն» կուսակցության թեկնածու Դավիթ Հարությունյանն ընտրվել է Հայաստանի Եղեգնաձոր համայնքի ղեկավար։ Նորընտիր ավագանին նրան ընտրել է նոյեմբերի 11-ի իր առաջին նիստում՝ 14 ձայնով։ «Քաղաքացիական պայմանագրի» թեկնածու Հուսիկ Սահակյանը ստացել է 13 ձայն։

Հարությունյանը Եղեգնաձորը ղեկավարում է 2012 թվականից։ Ընտրությունն անցկացվել է խոշորացված համայնքում․ համայնքների խոշորացման արդյունքում Արենին ու Եղեգիսը միավորվել են Եղեգնաձորի հետ։ Սահակյանն Արենիի գործող համայնքապետն է և այն ղեկավարում է 1996 թվականից։

Վճռորոշ մանդատը

Հոկտեմբերի 25-ի ավագանու ընտրություններում «Հանրապետությունն» ու իշխող «Քաղաքացիական պայմանագիրը» ստացել են հավասար թվով մանդատներ, թեև «Քաղաքացիական պայմանագիրը» «Հանրապետությունից» 189 ձայն ավելի է ստացել։ Մնացած մեկ մանդատը ստացել է «Նոր դարաշրջանը», որի ավագանու անդամի ձայնը կարող էր որոշել համայնքի ղեկավարի ընտրության ելքը։

«Նոր դարաշրջանի» ավագանու անդամ Մարտին Հարությունյանը որոշել է քվեարկել Դավիթ Հարությունյանի օգտին։ «Նոր դարաշրջանը» խորհրդարանական ընտրություններին մասնակցել է «Ուժեղ Հայաստան» դաշինքի կազմում։

Իշխող «Քաղաքացիական պայմանագիր» կուսակցությանը մոտ Civic.am կայքը հայտնել է, որ «Ուժեղ Հայաստանը», որը կայքի բնորոշմամբ հանդես է գալիս «Նոր դարաշրջանի» անվան տակ, քվեարկել է «Հանրապետության» օգտին։ Նույն օրը՝ ավելի վաղ, կայքը, հղում անելով իր տեղեկություններին, կանխատեսել էր այդ աջակցությունը։

NEWS.am-ը հայտնել է, որ «Քաղաքացիական պայմանագիրը» քվեարկության կեսից բոյկոտել է նիստն ու հեռացել դահլիճից։ Նրա անդամների հեռանալուց հետո նիստը շարունակվել է։