Ամստերդամի ոստիկանները ձերբակալել են Microsoft-ի տվյալների կենտրոնում 150–200 ցուցարարի

Ամստերդամի ոստիկանությունը Microsoft-ի տվյալների կենտրոնի շինհրապարակ ապօրինի մուտք գործելու կասկածանքով ձերբակալել է 150–200 ցուցարարի, գրել է Tom’s Hardware-ը՝ վկայակոչելով ոստիկանությանը։ Բողոքի ակցիային նախորդել էր նոյեմբերի 6-ին տարածք ներխուժումը։

Տարածքը պատկանում է Pure Data Centres-ին, իսկ Microsoft-ը լինելու է տվյալների կենտրոնի միակ վարձակալը։ Ավելի վաղ ակցիայի ընթացքում Microsoft-ը հայտնել էր, որ հարգում է կարծիքը խաղաղ արտահայտելու իրավունքը, բայց չի արդարացնում ապօրինի գործողությունները։ Pure Data Centres-ը տարածքում գտնվող մարդկանց հորդորել էր անվտանգ հեռանալ և քննարկել իրենց մտահոգությունները։

Ոստիկանության վարկածն ու հաջորդ քայլերը

Ոստիկանությունը հայտնել է, որ առգրավել է տարածք ներխուժելու համար նախատեսված գործիքները, ապա թույլ տվել ցուցարարներին խաղաղ շարունակել ակցիան։ Ոստիկանության վարկածով՝ դրանից հետո ցուցարարներից ոմանք ուժով մտել են շինհրապարակ, ինչի հետևանքով ոստիկանությունը միջամտել է և ձերբակալություններ կատարել։

Ոստիկանությունը նաև հայտնել է, որ որոշ ցուցարարների իրերի մեջ հայտնաբերել է առարկաներ, որոնք, կասկածվում է, գողացվել են տարածքից։ Ոստիկանությունը հայտնել է նաև տարածքում վնասների և վանդալիզմի մասին։

Կասկածյալներին տեղափոխել են կալանավայր, որտեղ դեռ պետք է որոշվեր՝ շարունակե՞լ նրանց պահել կալանքի տակ։ Ոստիկանությունը հայտնել է, որ դրանից հետո բոլոր կասկածյալները կհարցաքննվեն։