Չարլզ արքան Մեծ Բրիտանիայում գլխավորել է լռությունն ու սկսել ծաղկեպսակադրումը

Նոյեմբերի 8-ին Չարլզ արքան գլխավորել է երկրոպեանոց լռության արարողությունը և առաջին ծաղկեպսակը դրել Լոնդոնի Կենոտաֆ հուշարձանի մոտ, որտեղ Մեծ Բրիտանիան անցկացրել է պատերազմներում զոհվածների հիշատակին նվիրված Հիշատակի կիրակիի ազգային արարողությունը։

Արարողության ավանդույթը սկիզբ է առնում դաշնակիցների և Գերմանիայի միջև կնքված զինադադարից, որն ուժի մեջ է մտել 1918 թ․ նոյեմբերի 11-ին՝ վերջ դնելով Առաջին համաշխարհային պատերազմի Արևմտյան ճակատում ռազմական գործողություններին։

Վետերանները մասնակցել են երթին

Արարողությանը հորը միացել է արքայազն Ուիլյամը՝ թագավորական հեծելազորի փոխգնդապետի սև համազգեստով։ Լռության ավարտն ազդարարվել է թնդանոթի կրակոցով, որից հետո թագավորական ծովային հետևակի փողահարները կատարել են «Վերջին փողը»։ Այնուհետև մոտ 10 000 վետերան մասնակցել է հանդիսավոր երթին՝ ներկայացնելով զինված ուժերի և քաղաքացիական ավելի քան 300 կազմակերպություն, The Guardian-ը հայտնել է։ Հավաքվածները ծափահարել են վետերաններին, որոնցից ոմանք ձեռքով ողջունել կամ պատիվ են տվել։ Ավագ մասնակիցներից ոմանք օգտվել են անվասայլակներից կամ շարժունակության սկուտերներից։

Արարողությանը մասնակցած Երկրորդ համաշխարհային պատերազմի մոտ մեկ տասնյակ վետերաններից ամենատարեցը Ջեֆրի Բրերետոնն էր։ Նա 1940-ին՝ 19 տարեկանում, կամավոր միացել է թագավորական ռազմաօդային ուժերին և Բրիտանիայի ճակատամարտի ընթացքում աշխատել որպես Hurricane ինքնաթիռների մեխանիկ։

Երթի ամենաերիտասարդ մասնակիցը 8-ամյա Ռոնան Դոնկաստերն էր, որը քայլել է ի պատիվ իր հոր։ Վերջինս Քոլդսթրիմի գվարդիայի 1-ին գումարտակի զինծառայող էր և մահացել է 2024-ի ապրիլին։

Նոյեմբերի 11-ին կնշվի Զինադադարի օրը

Զինադադարի օրվան նվիրված առաջին պաշտոնական միջոցառումները տեղի են ունեցել Բուքինգհեմյան պալատի տարածքում՝ 1919 թ․ նոյեմբերի 11-ին։ Երկու րոպե լռությամբ հարգանքի տուրք է մատուցվել պատերազմում զոհվածներին և նրանցից հետո մնացած մարդկանց։ 1939-ից Բրիտանիան լռության արարողությունը տեղափոխել է մոտակա կիրակի՝ պատերազմի ժամանակ արտադրության աշխատանքը չխաթարելու համար։ Այդ օրը հետագայում կոչվել է Հիշատակի կիրակի։