89 տարեկանում մահացել է Արևմտյան Վիրջինիայի նախկին նահանգապետ ու սենատոր Ջեյ Ռոքֆելլերը

89 տարեկանում մահացել է Արևմտյան Վիրջինիայի նախկին դեմոկրատ նահանգապետ և ԱՄՆ երկարամյա սենատոր Ջոն Դ. «Ջեյ» Ռոքֆելլեր IV-ը։ Նա նահանգապետ էր ընտրվել 1976-ին, իսկ չորս տարի անց վերընտրվել էր երկրորդ ժամկետով։ 1984-ի ընտրություններում հաղթելուց հետո նա անցել էր Սենատ։

Ընտանիքի ներկայացուցիչ Շելլի Ռոջերսը հաստատել է նրա մահը, նոյեմբերի 6-ին գրել է Town & Country-ն։ West Virginia Public Broadcasting-ը ևս գրել է, որ մահը հաստատել է WETA հանրային հեռարձակման կայանի արտաքին կապերի գծով փոխնախագահ Մերի Ստյուարտը։ Ռոքֆելլերը մահացել է հինգշաբթի գիշերը՝ Վաշինգտոնի իր տանը։ Town & Country-ի հրապարակման պահին մահվան պատճառը չէր նշվել։

Կամավորից՝ սենատոր

Ռոքֆելլերն Արևմտյան Վիրջինիա էր եկել 1964-ին՝ որպես աղքատության դեմ պայքարի ծրագրի կամավոր։ 1966-ին նա ընտրվել էր նահանգի Պատվիրակների պալատի անդամ, իսկ երկու տարի անց դարձել նահանգի պետքարտուղար։

Նահանգապետի պաշտոնում նա ստեղծել էր Արևմտյան Վիրջինիայի ածխահանքերում առողջության և անվտանգության խորհուրդը։ Նա նաև հրաժարվել էր դիմել Ազգային գվարդիային՝ 1977–1978 թվականների ածխահանքերի աշխատողների գործադուլը ճնշելու համար, գրել է West Virginia Public Broadcasting-ը՝ վկայակոչելով Արևմտյան Վիրջինիայի համալսարանի Ռոքֆելլերի գրադարանը։

Սենատում Ռոքֆելլերը 1997-ին երեխաների առողջության ապահովագրության ծրագրի գլխավոր հեղինակներից էր։ Դաշնային և նահանգային իշխանությունների համատեղ ծրագիրը մատչելի առողջապահական ապահովագրություն է տրամադրում այն երեխաներին, որոնց ընտանիքների եկամուտը չափազանց բարձր է Medicaid-ից օգտվելու համար։

1993-ից 2003 թվականներին նա երեք առանձին ժամկետով նախագահել էր Սենատի վետերանների հարցերի հանձնաժողովը, ապա 2009-ից 2015 թվականներին ղեկավարել առևտրի, գիտության և տրանսպորտի հանձնաժողովը։ Այդ տարի նա հեռացել էր պաշտոնից՝ Սենատում շուրջ 30 տարի և հինգ անընդմեջ ժամկետ ծառայելուց հետո։