Շանհայի կարգավորիչ․ Apple Intelligence-ը գրանցվել է Չինաստանում iPad-ի և Mac-ի համար

Շանհայի կիբերտարածքի կարգավորիչը 2026 թ․ նոյեմբերի 9-ին հայտնել է, որ Apple Intelligence-ը գրանցվել է Չինաստանում պլանշետների և նոութբուքերի վրա օգտագործելու համար։ Գրանցման մասին գրել է Reuters-ը, որի հրապարակումը ներկայացրել է 9to5Mac-ը։

Apple Intelligence-ը iPhone-ի համար արդեն ստացել էր հաստատում 2026-ի հուլիսին։ Չինաստանում գեներատիվ գերբանականության (ԳԲ) ծառայությունները հանրությանը հասանելի դարձնելուց առաջ պահանջվում է գրանցում, սակայն այս վերջին քայլն ինքնին ծառայությունը հասանելի չի դարձնում iPad-ի կամ Mac-ի վրա։

Նախատեսվող գործարկումը

Հոկտեմբերի վերջին Apple-ը հայտնել է, որ նախատեսում է Apple Intelligence-ը Չինաստանում գործարկել 2026-ի դեկտեմբերին՝ iOS 27.3-ի հետ։ Սկզբում ծառայությունը հասանելի էր լինելու միայն iPhone-ի համար, քանի որ մյուս հարթակները դեռ սպասում էին կարգավորիչի հաստատմանը։ Մի քանի օր անց թողարկվել է iOS 27.3-ի՝ մշակողների համար նախատեսված փորձնական տարբերակը, որը Չինաստանում օգտատերերին հնարավորություն է տվել փորձարկել ծառայությունը՝ նախքան դրա հանրային գործարկումը։

Չինաստանում Apple Intelligence-ը ԳԲ որոշ գործառույթների համար օգտագործում է Alibaba-ի Qwen մոդելը։ Qwen-ը Alibaba Cloud-ի մշակած՝ հիմնականում բաց կշիռներով մեծ և փոքր լեզվային մոդելների ընտանիք է։

Apple-ը չի հաստատել՝ արդյոք iPad-ի և Mac-ի աջակցությունը նույնպես հասանելի կլինի դեկտեմբերին։