Հայաստանում առաջարկում են սահմանափակել երեխաների դեմ սեռական հանցանքի անպատժելիությունը

Հայաստանի ներքին գործերի նախարարի տեղակալ Արմեն Մկրտչյանը փոփոխությունները ներկայացրել է Ազգային ժողովի պետական-իրավական հարցերի մշտական հանձնաժողովում։ Դրանցով առաջարկվում է երեխաների սեռական ազատության կամ սեռական անձեռնմխելիության դեմ հանցագործությունների դեպքում արգելել տուժողի հետ հաշտվելու կամ գործուն զղջալու հիմքով քրեական պատասխանատվությունից ազատումը։

Մկրտչյանի խոսքով՝ ուսումնասիրությունները ցույց են տվել, որ դատական պրակտիկայում քիչ չեն դեպքերը, երբ 16 տարին չլրացած երեխաների նկատմամբ սեքսուալ բնույթի գործողություններ կամ անառակաբարո արարքներ կատարելու մեջ մեղադրվող անձինք այդ հիմքերով ազատվել են քրեական պատասխանատվությունից։ Նա այդ տարիքի երեխաներին բնութագրել է որպես առանձնապես անպաշտպան և մշտապես պետության հատուկ հոգածության ներքո գտնվող։

Առաջարկվում է պատասխանատվություն սահմանել վճարովի օգտվողների համար

Փաթեթով առաջարկվում է քրեական պատասխանատվություն սահմանել նաև երեխայի սեռական ծառայություններից վճարովի օգտվելու համար։ Առաջարկվող նոր հանցակազմը ներկայացնելիս իշխող «Քաղաքացիական պայմանագիր» կուսակցությանը մոտ Civic.am կայքը բացատրել է, որ ներկայում սեռական ազատության կամ սեռական անձեռնմխելիության դեմ ուղղված արարքների համար պատասխանատվություն է նախատեսված միայն 16 տարին չլրացած անձանց դեպքում։ Նախագծի հիմնավորմամբ՝ 16 տարին լրանալուց հետո երեխայի սեռական ազատության առկայությունը չի նշանակում, որ նա կարող է ներգրավվել պոռնկության մեջ։