Կիպրոսի առաջնորդները պայմանավորվել են երկու անցակետ բացել

Հույն կիպրացիների առաջնորդ Նիկոս Քրիստոդուլիդիսը և թուրք կիպրացիների առաջնորդ Թուֆան Էրհյուրմանը նոյեմբերի 9-ին պայմանավորվել են միաժամանակ երկու անցակետ բացել Կիպրոսը բաժանող գծի վրա։ Նրանք ՄԱԿ-ի վերահսկողության տակ գտնվող բուֆերային գոտում հանդիպել են կազմակերպության բանագնաց Մարիա Անխելա Օլգինի հետ։ Անցակետերի բացման ամսաթիվը դեռ հաստատված չէ։

Վերամիավորման շուրջ պաշտոնական բանակցությունների վերջին փուլը ձախողվել է 2017-ին, իսկ կողմերը տարաձայնություններ են ունեցել բանակցությունների վերսկսման հիմնական կանոնների շուրջ։ Գուտեռեշն ամռանը նոր նախաձեռնություն է սկսել՝ առաջարկելով անցակետերի միջոցով վստահություն ձևավորել։

Անցակետերը և մյուս միջոցառումները

Անցակետերից մեկը թուրք կիպրացիներով բնակեցված Լուրուջինա գյուղը կկապի հույն կիպրացիներով բնակեցված Լիմպիայի հետ։ Մյուսը Մորֆուի ծոցում գտնվող Կարավոստասին կկապի Տրոդոս լեռների ստորոտում գտնվող Կամբոսի հետ, գրել է Cyprus Mail-ը։ Երկու անցակետերն էլ պետք է պատրաստ լինեն միաժամանակ բացվելու։

ՄԱԿ-ի խաղաղապահ ուժերի խոսնակ Ալիմ Սիդիկին ասել է, որ ճգնաժամերի կառավարման տեխնիկական կոմիտեն արտակարգ իրավիճակներին արագ արձագանքելու մեխանիզմ կստեղծի։ Առաջնորդները պայմանավորվել են նաև մշակութային ժառանգության տեխնիկական կոմիտեի միջոցով փոխանակել արխիվային նյութերը և շրջակա միջավայրի տեխնիկական կոմիտեի միջոցով առաջ տանել նախագծերը։

Սիդիկին ասել է, որ երկու համայնքների մասնակցությամբ Imagine կրթական ծրագիրը կվերսկսվի կրթության տեխնիկական կոմիտեի հովանու ներքո։ Ծրագիրը սառեցված էր 2022-ից, երբ թուրք կիպրական կողմը դուրս եկավ դրանից։

Սիդիկիի խոսքով՝ մշակութային ժառանգության կոմիտեն կվերականգնի նաև որոշակի մարոնիական եկեղեցիներ և հայկական վանք։ Cyprus Mail-ը գրել է, որ խոսքը, ենթադրաբար, Կիրենիայի շրջանում գտնվող Սուրբ Մակար վանքի մասին է, որտեղ նախկին աշխատանքները դադարել էին ՄԱԿ-ի զարգացման ծրագրի և նրա կապալառուի միջև վեճից հետո։