Լուիզիանայի պետական համալսարանի բասկետբոլի նախկին մարզիչ Դեյլ Բրաունը մահացել է 90 տարեկանում

90 տարեկանում մահացել է Դեյլ Բրաունը, որը Լուիզիանայի պետական համալսարանի բասկետբոլի թիմին երկու անգամ հասցրել է ազգային առաջնության կիսաեզրափակիչ և ավելի շատ հաղթանակներ տարել, քան համալսարանի պատմության որևէ այլ մարզիչ։ ESPN-ի հաղորդմամբ՝ համալսարանը նրա մահվան մասին հայտնել է հոկտեմբերի 23-ին։

Բրաունը համալսարանի թիմը մարզել է 1972–1997 թվականներին։ Նրա առաջին մրցաշրջանում թիմը, որին կանխատեսում էին Հարավարևելյան մարզական կոնֆերենցիայի վերջին տեղը, կոնֆերենցիայի մրցաշարն ավարտել է 9 հաղթանակով և 9 պարտությամբ։ Այդ արդյունքի շնորհիվ Բրաունն առաջին անգամ ճանաչվել է կոնֆերենցիայի տարվա լավագույն մարզիչ։

Երկու անգամ՝ ազգային առաջնության կիսաեզրափակչում

25 մրցաշրջանի ընթացքում Բրաունը տարել է 448 հաղթանակ և չորս անգամ նվաճել Հարավարևելյան մարզական կոնֆերենցիայի չեմպիոնի տիտղոսը։ Նրա թիմերը 13 անգամ մասնակցել են Ազգային ուսանողական մարզական ասոցիացիայի մրցաշարին՝ ուսանողական բասկետբոլի ազգային առաջնությանը։ Լուիզիանայի պետական համալսարանի թիմը 1981 և 1986 թվականներին հասել է դրա «Եզրափակիչ քառյակ»՝ կիսաեզրափակիչ փուլ։

1981 թվականին Բրաունը ճանաչվել է երկրի տարվա լավագույն մարզիչ, իսկ իր կոնֆերենցիայում այդ պատվին արժանացել է չորս անգամ։

Նրա սաների թվում էին Շաքիլ Օ’Նիլը և Մահմուդ Աբդուլ-Ռաուֆը։ Բրաունն Օ’Նիլին մարզել է երեք մրցաշրջան՝ սկսած 1989–90 թվականներից։ Այդ մրցաշրջաններից առաջինում թիմում խաղացել է նաև Աբդուլ-Ռաուֆը։ Համալսարանի թիմը բոլոր երեք մրցաշրջաններում էլ ազգային առաջնության ուղեգիր է նվաճել, սակայն երկրորդ փուլից այն կողմ չի անցել։

ESPN-ի հաղորդմամբ՝ Ազգային ուսանողական մարզական ասոցիացիան, հետաքննելով խաղացողների հավաքագրման ենթադրյալ գործելակերպը, որն այժմ թույլատրված է, 1996–97 մրցաշրջանում եզրակացրել էր, որ թիմի ֆինանսական աջակիցներից մեկը համալսարանի նախկին խաղացող Լեսթեր Էրլին մոտ 5 000 դոլար էր վճարել, երբ նա խաղում էր թիմում։ Բրաունը մարզչական կարիերան ավարտել է 1997 թվականին։ 1998 թվականին համալսարանի նկատմամբ սահմանվել է փորձաշրջան՝ որպես պատժամիջոց։ Բրաունը պնդում էր, որ ասոցիացիան իրեն անարդարացիորեն թիրախավորել է։