88 տարեկանում մահացել է վահ-վահ ոտնակը հորինած Դել Քեշերը

Սեսիոն կիթառահար Դել Քեշերը, որին վերագրվում է ոտքով կառավարվող վահ-վահ էֆեկտի գյուտը, մահացել է հոկտեմբերի 1-ին՝ 88 տարեկանում, քաղցկեղի դեմ պայքարից հետո։ Էֆեկտը կիթառահարներին թույլ է տալիս ոտքով փոխել էլեկտրակիթառի տեմբրը՝ ստանալով «վահ-վահ» արտասանող մարդու ձայնը հիշեցնող հնչյուն։

Նրա մահվան մասին հայտնի է դարձել կնոջ՝ Էիկոյի համար կազմակերպված դրամահավաքից, գրել է Billboard-ը։ Վկայակոչելով Guitar Player ամսագիրը՝ Billboard-ը գրել է, որ Քեշերն ուժեղարարի տեմբրի կարգավորման էլեկտրական շղթան վերածել է այդ էֆեկտի՝ աշխատելով Vox-ի և դրա ամերիկյան մայր ընկերության՝ Thomas Organ-ի հետ։

Ուժեղարարի կարգավորիչից՝ ոտնակ

1966-ին, երբ Քեշերը Vox-ի խորհրդատուն էր, նկատել է, որ ուժեղարարի տեմբրի կարգավորիչը պտտելիս այդ հնչյունն է առաջանում։ Քեշերը համոզել է ընկերության ինժեներներին իր գաղափարի հիման վրա ոտնակ ստեղծել, որն սկզբում կոչվել է Cry Baby։ Ոտնակը շարժելով՝ կիթառահարները կարողանում էին սահուն անցնել ձայնային հաճախականությունների միջով՝ փոխելով կիթառի տեմբրը։

Քեշերը երաժշտական խանութների համար ցուցադրական ալբոմ է ձայնագրել, սակայն 1967-ին թողարկվելուց հետո ոչ ալբոմը, ոչ էլ ոտնակը մեծ ուշադրության չեն արժանացել։ Այն բանից հետո, երբ Քեշերը 1966-ին նվագել է Ֆրենկ Զապպայի «Մադերզ օֆ Ինվենշն» խմբի հետ, Զապպան ոտնակներից մեկը տվել է Ջիմի Հենդրիքսին։ Billboard-ը գրել է, որ էֆեկտի տարածմանը նպաստել է դրա օգտագործումը Հենդրիքսի կողմից՝ 1968-ին «Electric Ladyland» ալբոմում և 1969-ին Վուդստոքում։

Որպես սեսիոն երաժիշտ՝ Քեշերը համագործակցել է Ջին Օթրիի, Ֆրենկ Սինատրայի և Սոնի ու Շերի հետ։ Universal Pictures-ը նրան վարձել է էֆեկտն օգտագործելու «The Ghost and Mr. Chicken» (1966) և «Shakiest Gun in the West» (1968) ֆիլմերի երաժշտության մեջ։

Քեշերը նաև Roland-ի համար մշակել է կիթառ-սինթեզատորի վաղ տեխնոլոգիաներից մեկը, ինչպես նաև կատարել ու պրոդյուսավորել է «The New Zoo Revue» մանկական հեռուստասերիալի ավելի քան 200 դրվագների երաժշտությունը։