Մեծ Բրիտանիայի կրթության նախարարությունը կկրճատի Անգլիայի միջնակարգի քննանյութը

Անգլիայի կրթության նախարարությունը նախատեսում է կրճատել GCSE դասընթացների բովանդակությունը և խորհուրդ տալ դպրոցներին դրանք վաղաժամ չսկսել աշակերտների մեծ խմբերի համար։ GCSE-ն միջնակարգ դպրոցի որակավորում է, որին նախապատրաստող դասընթացները սովորաբար անցնում են 10-րդ և 11-րդ դասարաններում։

Շատ միջնակարգ դպրոցներ GCSE-ի նյութը սկսում են ուսուցանել 9-րդ դասարանում՝ դասընթացի բովանդակությունն ավելի երկար ժամանակահատվածի վրա բաշխելու համար։ Կրթության նախարար Լյուսի Փաուելի խոսքով՝ բովանդակության կրճատումը թույլ կտա դասընթացներն առանց դժվարության տեղավորել դրանց հատկացված ժամանակացույցում։

Դպրոցները կպահպանեն ճկուն մոտեցման հնարավորությունը

Նախարարությունը հայտնել է, որ ուսումնական ծրագիրը դպրոցներին խորհուրդ կտա սովորական պրակտիկա չդարձնել աշակերտներից առարկաների ընտրությունը վաղաժամ սահմանափակել կամ քննությունները վաղ հանձնել պահանջելը։ Առաջարկվող քաղաքականությունը պարտադիր չի լինի․ դպրոցները կկարողանան GCSE դասընթացներ անցկացնել նաև ավելի փոքր տարիքի այն աշակերտների համար, որոնք, իրենց գնահատմամբ, ունակ են մասնակցելու դրանց, գրել է The Guardian-ը։

Փաուելի պնդմամբ՝ քննությունների ճնշումն ու գերհագեցած ուսումնական ծրագիրը սահմանափակում են աշակերտների ստացած գիտելիքների շրջանակը և նրանց շտապեցնում քննությունների՝ նախքան հիմնարար գիտելիքներին տիրապետելը։ Նրա խոսքով՝ բովանդակության կրճատումը դպրոցներին ավելի շատ ժամանակ կտա խորքային ըմբռնում զարգացնելու և աշակերտներին ավելի բազմազան ուսուցման մեջ ներգրավելու համար։

Նախարարությունը հայտնել է, որ առաջարկները կրթությունից աշակերտների օտարման, հարուստ և աղքատ ընտանիքների աշակերտների միջև առկա տարբերության, ինչպես նաև կրթությունից, աշխատանքից կամ մասնագիտական պատրաստությունից դուրս մնացած երիտասարդների թվի աճի դեմ պայքարի ջանքերի մասն են։ Նախարարությունը նախատեսում է ազգային ուսումնական ծրագրի վերանայված տարբերակը հրապարակել 2027-ի սկզբին։