Անգլիայի օմբուդսմենը պարզել է՝ անվասայլակի սպասումը հասնում է 2 տարվա

Անգլիայում մարդիկ անվասայլակին սպասում են մինչև 2 տարի՝ Առողջապահության ազգային ծառայության մարմինների և մասնավոր մատակարարների հետ կապված ուշացումների պատճառով։ Սա պարզել է Անգլիայի խորհրդարանական և առողջապահական ծառայությունների օմբուդսմեն Փոլա Սասեքսի քննությունը։ Սասեքսի խոսքով՝ ուշացումները սահմանափակում են անվասայլակ օգտագործողների ինքնուրույնությունը և կարող են ֆիզիկական ցավ ու հուզական տառապանք պատճառել։

Սասեքսը քննությունը սկսել է այն բանից հետո, երբ կտրուկ աճել է Առողջապահության ազգային ծառայության կողմից անվասայլակների տրամադրման վերաբերյալ բողոքների թիվը։ The Guardian-ը գրել է, որ ստացված ամեն 5 բողոքից 4-ը վերաբերում է մի քանի մասնավոր ընկերությունների, որոնք անվասայլակներ են մատակարարում դրանց կարիքն ունեցող երեխաների և մեծահասակների առնվազն կեսին։

Մանկապարտեզ չհաճախելու և ինքնուրույնությունը կորցնելու հետևանքները

Այժմ 6 տարեկան Էլիոթ Քրուզ Գարդիյանօղլուն 3 տարեկանում անվասայլակին սպասել է 7 ամիս։ Մանկական ուղեղային կաթված ունեցող Էլիոթը չի կարողացել իր երկվորյակ եղբոր հետ սկսել մանկապարտեզ հաճախել կամ մասնագիտացված թերապիա ստանալ։ Սպասելու ընթացքում նա մի քանի անգամ ընկել է ծնողների օգտագործած հարմարեցված մանկասայլակից և վնասվել։

Նրա մայրը՝ Ջանիա Քրուզը, ասել է, որ ընտանիքին չէին զգուշացրել երկար սպասման մասին, այլապես իրենք այլ տարբերակներ կփնտրեին։ Նրա խոսքով՝ Էլիոթի համար շատ ծանր էր տեսնել, թե ինչպես է եղբայրը դպրոց գնում, մինչդեռ ինքը չի կարող։

Ողնուղեղային մկանային ատրոֆիա՝ աստիճանաբար զարգացող հիվանդություն ունեցող Գրեհեմ Վուլները պետք է նոր անվասայլակ ստանար մինչև 2023-ի օգոստոսը։ Այն հասել է 2024-ի սեպտեմբերին, բայց պատշաճ չի աշխատել։ Լիովին սարքին անվասայլակ նա ստացել է 2025-ի հոկտեմբերին։

Վուլների խոսքով՝ մարտկոցի չլուծված խնդիրների պատճառով նա մեկ տարի չի կարողացել տեղաշարժվել՝ վստահ լինելով, որ կկարողանա գնալ ու վերադառնալ։ Ի վերջո նա դադարել է առանց որդու տնից դուրս գալ, որպեսզի անհրաժեշտության դեպքում որդին կարողանա անվասայլակը հրելով իրեն տուն հասցնել։