Անգլիայի կրթության կարգավորիչը․ գերբանականությունը սպառնում է դիպլոմների վստահելիությանը

Անգլիայի Ուսանողների հարցերով գրասենյակը հայտնել է, որ գնահատվող աշխատանքներում գերբանականության (ԳԲ) կիրառումը սպառնում է բուհական դիպլոմների արժանահավատությանը։ Գրասենյակի հետազոտության մասնակից ուսանողները պատմել են, որ իրենց համակուրսեցիներն օգտագործել են տեխնոլոգիան, իսկ աշխատակիցները դա չեն նկատել։

Բարձրագույն կրթության կարգավորիչը զգուշացրել է, որ համալսարաններն ու քոլեջները կարող են խախտել գրանցման պայմաններն ու պատժամիջոցների ենթարկվել, եթե չմշակեն ուսանողների գիտելիքներն ու հմտությունները չափելու հիմնավորված և հուսալի եղանակներ։ Գրասենյակը խորհուրդ է տալիս, առանց համապետական պահանջ սահմանելու, ավելի հաճախ կիրառել ավանդական քննություններն ու առկա ներկայացումները։ The Guardian-ը հայտնել է, որ դասախոսները մտահոգություն են հայտնել ուսումնական աշխատանքների գնահատման վերաբերյալ։

Ինչ են պատմել ուսանողներն ու աշխատակիցները

Կարգավորիչը հետազոտությունն անցկացրել է համալսարանական կառավարումն ու դասավանդումը խթանող Advance HE բարեգործական կազմակերպության հետ։ Այն հիմնված է առնվազն 127 համալսարանի բարձրագույն կրթության ոլորտի 244 աշխատակցի և 91 ուսանողի փորձառությունների ու մտահոգությունների վրա, այլ ոչ թե չարաշահման համապետական չափված ցուցանիշի։ The Guardian-ի հաղորդմամբ՝ ուսանողների և աշխատակիցների հետ հարցազրույցներն անցկացվել են 2026 թվականին։ Advance HE-ի գործադիր տնօրենի տեղակալ Քեթրին Հարիսոն-Գրեյվսն ասել է, որ ուսանողները ցանկանում էին ավելի հստակ իմանալ, թե ինչ է ակնկալվում իրենցից, մինչդեռ աշխատակիցների վստահության և աջակցության մակարդակները տարբեր էին։

Հետազոտության համաձայն՝ առանց վերահսկողության կատարվող գնահատման բազմաթիվ առաջադրանքներ հնարավոր է բարձր մակարդակով կատարել ԳԲ-ի միջոցով՝ ուսանողի սահմանափակ ներգրավմամբ, իսկ դրա կիրառումը հաճախ հնարավոր չէ հուսալիորեն հայտնաբերել։ Ուսանողները պատմել են, որ իրենց համակուրսեցիները րոպեների ընթացքում ավարտել են աշխատանքները և ստացել ԳԲ չօգտագործած ուսանողների գնահատականներին մոտ գնահատականներ։ Որոշ աշխատակիցներ պատմել են, որ ստացել են ոճով և հղումներով նման բազմաթիվ աշխատանքներ։ Մյուսները կասկածել են, թե իրենց հաստատությունների գնահատման եղանակները ճշգրիտ չափում են ուսանողների գիտելիքներն ու հմտությունները։