Ռումբի սպառնալիքները խափանել են Եվրոպայում ևս առնվազն 18 չվերթ

Նոյեմբերի 6-ին ռումբի սպառնալիքները խաթարել են ևս առնվազն 18 չվերթ Եվրոպայում։ Ինքնաթիռներն անվտանգ վայրէջք են կատարել, իսկ խուզարկությունների ընթացքում պայթուցիկ սարքեր չեն հայտնաբերվել։

Նույն շաբաթվա սկզբին հնչած այլ սպառնալիքների պատճառով առնվազն 35 չվերթ ստիպված էր փոխել երթուղին կամ անցնել զննություն։

Ֆրանսիայի դատախազությունն այդ դեպքերից հետո քննություն է սկսել։ Փարիզի դատախազությունը AFP-ին հայտնել է, որ քննիչները փնտրում են կեղծ սպառնալիքներով նամակներն ուղարկած անձանց և պարզում նրանց հնարավոր կապերն օտարերկրյա ուժերի հետ։ Պատասխանատուները դեռ հայտնի չեն։

Ուղեկցում, երթուղու փոփոխություններ և զննություններ

Հունգարիայի պաշտպանության նախարար Ռոմուլուս Ռուսին-Սենդին ասել է, որ սպառնալիքների մասին հաղորդումներից հետո նոյեմբերի 6-ին կործանիչները 3 անգամ օդ են բարձրացվել՝ Հունգարիայի օդային տարածքում քաղաքացիական ինքնաթիռներն ուղեկցելու համար։ Ֆրանսիայի վարչապետի գրասենյակը հայտնել է, որ 4 նոր սպառնալիք է հնչել Ֆրանսիայի տարածքի վրայով թռչող ինքնաթիռների հասցեին․ բոլորն անվտանգ վայրէջք են կատարել, իսկ սակրավորները զննում էին դրանք։

Պրահայի օդանավակայանը հայտնել է, որ սպառնալիքներն ազդել են 9 չվերթի վրա, և ոստիկանությունն անվտանգության միջոցներ է ձեռնարկել, սակայն օդանավակայանի բնականոն աշխատանքը չի խաթարվել։ Պրահայից Հռոմ մեկնող Wizz Air-ի ինքնաթիռը փոխել է երթուղին և անվտանգ վայրէջք կատարել Վենետիկում։

Նիդեռլանդների ռազմական ոստիկանությունը հայտնել է, որ Ամստերդամ մեկնող KLM-ի ինքնաթիռում, որի հասցեին սպառնալիք էր հնչել, պայթուցիկ նյութեր չեն հայտնաբերվել։ Կոպենհագենի ոստիկանությունն ավարտել է քաղաքի օդանավակայանի ստուգումները և գնահատել, որ ուղևորներին ու օդանավակայանից օգտվող մյուս մարդկանց վտանգ չի սպառնացել․ օդանավակայանի ղեկավարությունը հայտնել է, որ այն բնականոն է աշխատում։