Ֆորմուլա 1․ Կիմի Անտոնելլին հաղթել է ԱՄՆ Գրան պրիում, բայց չեմպիոնը դեռ որոշված չէ

Անվադողերը փոխելու մեկ կանգառը բավարար էր

Mercedes-ն Անտոնելիի համար պահպանել է մեկ կանգառի ռազմավարությունը՝ անվադողերը փոխելու համար մեկ անգամ մտնելով բոքսեր, մինչդեռ Ֆերստապենն ու Լեկլերը կանգ են առել երկու անգամ։ Անտոնելին մեկնարկել է միջին կարծրության անվադողերով, իսկ 25-րդ շրջանում դրանք փոխել է ավելի կարծր ու երկարակյաց անվադողերով՝ մրցուղի վերադառնալով չորրորդ տեղում։ Առաջին կանգառից առաջ ավելի երկար մրցուղում մնալու շնորհիվ նա կարողացել է վերադարձնել առաջատարի դիրքը՝ առանց ևս մեկ կանգառի։

Ֆերստապենի երկրորդ կանգառից հետո՝ 32-րդ շրջանում, առաջատար է դարձել Լեկլերը։ Այնուհետև Անտոնելին 12-րդ շրջադարձում շրջանցել է Լեկլերին և վերադարձրել առաջին տեղը։ Լեկլերը 40-րդ շրջանում կրկին կանգառ է կատարել, ավելի ուշ շրջանցել Ֆերստապենին ու բարձրացել երկրորդ տեղ, սակայն Անտոնելիին հասնել չի կարողացել։

The Race-ի նկարագրությամբ՝ մրցարշավի վերջում, երբ Բոտասի Cadillac-ը մրցուղուց հեռացնելու համար գործարկվել էր վիրտուալ անվտանգության մեքենայի ռեժիմը և ավտոարշավորդները ժամանակավորապես դանդաղեցրել էին ընթացքը, Mercedes-ը որոշել է Անտոնելիին նոր անվադողերի համար բոքսեր չկանչել։ Նա մնացել է մրցուղում և ավարտել մրցարշավն առանց երկրորդ կանգառի։ The Race-ի գնահատմամբ՝ դանդաղեցումը, հավանաբար, օգնել է Ֆերստապենին պահպանել երրորդ տեղը Հեմիլթոնի՝ մրցարշավի վերջում գործադրած ճնշման պայմաններում։

Ֆերստապենը նաև շարժիչով արգելակման խնդիրներ է ունեցել․ խոսքը մեքենայի արագությունը նվազեցնելու գործում շարժիչի մասնակցության մասին է, գրել է Guardian-ը։

Ինչ է պետք Անտոնելիին Մեքսիկայում

Հեմիլթոնի չորրորդ և Ռասելի ութերորդ տեղերը երկուսին էլ պահպանել են չեմպիոն դառնալու մաթեմատիկական հնարավորություն, գրել է Motorsport Week-ը։ Անտոնելիի առավելությունը 123 միավոր է, իսկ դեռ կարելի է վաստակել 125-ը։ Պարբերականը Մեխիկոն համարել է այն հավանական վայրը, որտեղ նա կարող է դառնալ Իտալիայի առաջին անհատական չեմպիոնը 1953-ին Ալբերտո Ասկարիից հետո։

Անտոնելին Ռասելին գերազանցում է 123, իսկ Հեմիլթոնին՝ 124 միավորով։ Guardian-ի հաշվարկով՝ նրա ինը հաղթանակը միավորների հավասարության դեպքում հաղթանակների քանակով համեմատության շնորհիվ երաշխավորում է տիտղոսը, եթե Մեքսիկայի Գրան պրիից հետո նա պահպանի 100 միավորի առավելությունը։

Guardian-ի գնահատմամբ՝ Մեքսիկայի հաջորդ մրցարշավում և՛ Ռասելից, և՛ Հեմիլթոնից առաջ ավարտելը, կամ նրանց արդյունքներից անկախ իններորդ կամ ավելի բարձր տեղ զբաղեցնելն Անտոնելիին կապահովի իր առաջին չեմպիոնական տիտղոսը։ 20 տարեկանում նա կդառնա Ֆորմուլա 1-ի աշխարհի ամենաերիտասարդ չեմպիոնը։