Ռուսաստանի անվտանգության ծառայություն․ լրտեսության մեղադրանքով երկու անձ է ձերբակալվել

Ռուսաստանի անվտանգության դաշնային ծառայությունը (ԱԴԾ) հայտնել է, որ Կալինինգրադում ձերբակալել է երկու անձի և նրանց լրտեսության մեղադրանք առաջադրել։ Ծառայությունը նրանց մեղադրում է լեհական հետախուզության համար ռազմական օբյեկտների մասին տեղեկություններ հավաքելու մեջ։ Նոյեմբերի 11-ին Interfax-ը մեջբերել է ծառայության հայտարարությունը, գրել է The Moscow Times-ը։

Kommersant-ի հաղորդմամբ՝ երկու ձերբակալվածների նկատմամբ քրեական գործեր են հարուցվել Ռուսաստանի քրեական օրենսգրքի 276-րդ հոդվածով։

Կալինինգրադը Բալթիկ ծովի ափին գտնվող ռուսական էքսկլավ է, որը բաժանված է Ռուսաստանի մնացած տարածքից և սահմանակից է Լեհաստանին ու Լիտվային։ ԱԴԾ-ն չի հրապարակել կասկածյալների ինքնությունը, նրանց քաղաքացիությունն անհայտ է։

Լեհաստանի հատուկ ծառայությունների հարցերով նախարարի խոսնակ Յացեկ Դոբժինսկին ասել է, որ չի մեկնաբանի ռուսական հետախուզական ծառայությունների՝ համացանցում տարածած հայտարարությունները։ Լեհաստանի ազգային անկախության օրը նա այդ հայտարարությունները հերթական սադրանք և ապատեղեկատվության գործողություն է անվանել։

Նախազգուշացումներ և կալանք

ԱԴԾ-ն նաև հայտնել է, որ նախազգուշացրել է Լեհաստանի յոթ և Ռուսաստանի երեք քաղաքացու՝ լեհական անվտանգության ծառայությունների հետ ենթադրյալ կապերի համար։ Kommersant-ի հաղորդմամբ՝ նախազգուշացումները վերաբերում էին գործողությունների, որոնք կարող են որակվել որպես լրտեսություն կամ պետական դավաճանություն։ Ծառայության խոսքով՝ Լեհաստանի քաղաքացիներին երկար ժամանակով արգելվել է մուտք գործել Ռուսաստան։

ԱԴԾ-ն հայտնել է, որ դատարանը որոշել է երկու կասկածյալներին կալանքի տակ պահել։ Լրտեսության համար մեղավոր ճանաչվելու դեպքում նրանց սպառնում է առավելագույնը 20 տարվա ազատազրկում։