Գերմանիայի կարգավորող մարմինն ընտրել է պահուստային էլեկտրակայանների 11 նախագիծ

Գերմանիայի դաշնային ցանցային գործակալությունը նոյեմբերի 3-ին ընտրել է 11 էլեկտրակայանի նախագիծ, որոնք էլեկտրաէներգիա կմատակարարեն, երբ քամուց և արևից ստացվող էներգիան բավարար չլինի։ Կայանները պետք է կառուցվեն երկրի տարբեր վայրերում՝ մինչև 2031 թվականը։

Մրցույթին ներկայացվել է 41 հայտ։ Հաղթած նախագծերից 10-ն անցել է էներգետիկ RWE, LEAG ընկերություններին կամ նրանց հետ փոխկապակցված կազմակերպություններին, հայտնել է DW-ն։

Ծախսերն ու վառելիքի պլանները

Նախագծերի տարեկան ծախսերը, ըստ ակնկալիքների, կկազմեն €800 միլիոնից մի փոքր ավելի։ Դրանք էլեկտրաէներգիայի բոլոր սպառողները կհոգան նոր վճարի միջոցով, որը կհանգեցնի գների աճի, թեև պարզ չէ, թե որքանով դրանք կբարձրանան։

Կայաններն ի սկզբանե կաշխատեն բնական գազով։ Նախատեսվում է, որ դրանք կլիմայի համար չեզոք ջրածին կօգտագործեն ոչ ուշ, քան 2045 թվականին։

Greenpeace-ը քննադատել է ծրագիրը՝ նշելով, որ այն երկարաձգում է հանածո վառելիքից կախվածությունը։ Կազմակերպության խոսքով՝ առաջին մրցույթից դուրս են թողնվել այլընտրանքային լուծումները, օրինակ՝ էներգիայի կուտակման համակարգերը։