Goodman-ը և Digital Realty-ն գնել են NextDC-ի 9,9% բաժնեմասը

Goodman Group-ը և Digital Realty-ն անցյալ շաբաթ գնել են NextDC-ի 9,9% բաժնեմասը՝ դառնալով տվյալների կենտրոններ շահագործող ավստրալիական ընկերության բաժնետերեր։ Հրապարակված տեղեկությունների համաձայն՝ գործարքի արժեքը կազմել է A$715 միլիոն ($492 միլիոն)։

Գնումին նախորդել էր Մելբուռնում NextDC-ի M3 կենտրոնի ընդլայնման աշխատանքների կասեցումը։ Էլեկտրամատակարարման հետաձգումները և համայնքի դիմադրությունն ընկերությանը ստիպել էին հոկտեմբերին նվազեցնել շահույթի կանխատեսումը, ինչի հետևանքով նրա բաժնետոմսերի գինն ընկել էր 42%-ով։ Հետագայում բաժնետոմսերի գինը վերականգնել է կանխատեսման նվազեցումից հետո գրանցված անկումը, նոյեմբերի 9-ին գրել է CNA Business-ը։

Գնորդները չեն բացառում կլանման առաջարկը

Երկու գնորդներն էլ տվյալների կենտրոնների ոլորտում մրցակցում են NextDC-ի հետ։ Goodman-ը տիրապետում, կառուցապատում և կառավարում է անշարժ գույք ամբողջ աշխարհում, այդ թվում՝ տվյալների կենտրոններ և լոգիստիկ օբյեկտներ։ Digital Realty-ն Նյու Յորքի բորսայում ցուցակված ամերիկյան անշարժ գույքի ներդրումային տրաստ է, որն ամբողջ աշխարհում տիրապետում և շահագործում է տվյալների կենտրոններ, ինչպես նաև ներդրումներ է կատարում դրանցում։

Goodman-ը և Digital Realty-ն հայտնել են, որ այժմ կլանման առաջարկ անելու ծրագրեր չունեն, սակայն պահպանում են այդ իրավունքը։ Նրանք ասել են, որ կողջունեն NextDC-ի խորհրդի և ղեկավարության հետ հնարավոր համագործակցությունը՝ ընկերության խնդիրների լուծմանը նպաստելու ուղիներ գտնելու համար։