Մոլդովան 5 տարով արգելել է Մերձդնեստրի ղեկավարի մեկնումը երկրից

Մոլդովայի վերաինտեգրման քաղաքականության բյուրոն հայտարարել է Վադիմ Կրասնոսելսկու՝ երկրից մեկնելու 5 տարվա արգելքի մասին, որը կգործի նրա վերադառնալուց հետո։ Կրասնոսելսկին Մոսկվայի աջակցությունը վայելող Մերձդնեստրի փաստացի ղեկավարն է։ Անջատված այդ տարածաշրջանը միջազգայնորեն ճանաչված է որպես Մոլդովայի մաս։

Հայտարարությունը հաջորդել է նոյեմբերի 4-ին Կրեմլում կայացած արարողությանը, որի ընթացքում Ռուսաստանի նախագահ Վլադիմիր Պուտինը Կրասնոսելսկուն հանձնել է Ռուսաստանի Պատվո շքանշանը։ Պուտինը նրան վերագրել է Մոսկվայի հետ կապերի ամրապնդումը՝ չնայած, իր բնորոշմամբ, արտաքին ճնշմանը։

The Moscow Times-ը գրել է, որ բյուրոյի հայտարարությունը հրապարակել է տեղական Newsmaker լրատվամիջոցը։ Հայտարարության պահին Կրասնոսելսկու գտնվելու վայրն անհայտ էր, և պարզ չէր՝ արդյոք նա վերադարձել է Մոլդովա։

Պարգևը դատապարտել են Մոլդովայում

Արարողության ժամանակ Կրասնոսելսկին Պուտինին ասել է, որ Մերձդնեստրը «անվիճելիորեն ռուսական աշխարհի մասն է»։ Այդ եզրույթով նկարագրվում են Ռուսաստանի հետ մշակութային և պատմական կապեր ունեցող վայրերը։ Բյուրոն այցն ու պարգևատրումը դատապարտել է՝ դրանք համարելով ռուսական սադրանք, որի նպատակն է խոչընդոտել Մոլդովայի եվրաինտեգրմանը։ Խորհրդարանի նախագահ Իգոր Գրոսուն ևս նույն կերպ է բնորոշել դրանք։

Մերձդնեստրն անկախություն է հռչակել Խորհրդային Միության փլուզումից հետո և այդ ժամանակվանից ապավինել է Ռուսաստանի ֆինանսական և ռազմական աջակցությանը։ Մոլդովան Եվրամիությանն անդամակցելու հայտ է ներկայացրել 2022-ին Ռուսաստանի՝ Ուկրաինա ներխուժելուց հետո։

Կրասնոսելսկին դարձել է Մերձդնեստրի ղեկավար՝ 2016-ի նախագահական ընտրություններում Sheriff կոնգլոմերատի աջակցությամբ հաղթելով գործող նախագահ Եվգենի Շևչուկին։

Քննարկվում են լրացուցիչ պատժամիջոցներ

Ճամփորդական սահմանափակումից բացի, բյուրոն հայտնել է, որ քննարկում է Կրասնոսելսկու նկատմամբ լրացուցիչ պատժամիջոցներ կիրառելու հարցը՝ «առանց իրավիճակը սրելու»։ Բյուրոն մատնանշել է, իր բնորոշմամբ, Մոլդովայում իրավիճակն ապակայունացնելու Ռուսաստանի մշտական մտադրությունը։