Նեպալի հակակոռուպցիոն հանձնաժողովը մեղադրանք է առաջադրել նախկին վարչապետ Մադհավ Կումար Նեպալին և ևս 96 մարդու

Նեպալի լիազորությունների չարաշահման հետաքննության հանձնաժողովը նոյեմբերի 3-ին կոռուպցիայի մեղադրանք է առաջադրել նախկին վարչապետ Մադհավ Կումար Նեպալին և ևս 96 մարդու՝ ենթադրյալ հողափոխանակման գործով։ Հանձնաժողովի պնդմամբ՝ գործարքի հետևանքով կառավարությունը կորցրել է մոտ $4,8 միլիոն։

Գործը վերաբերում է հողատարածքին, որը Rijal Canning and Company Pvt Ltd-ին 1975-ից թույլատրվել էր տնօրինել օրենքով սահմանված առավելագույն չափից ավելի՝ պայմանով, որ այն կօգտագործվի մրգերի վերամշակման համար։ Հանձնաժողովի պնդմամբ՝ ընկերությունն այդպես էլ չի օգտագործել հողն այդ նպատակով, և այն պետք է վերադարձվեր պետական սեփականությանը։

Մեղադրանք է առաջադրվել նաև Մինենդրա Պրասադ Ռիջալին, որն այդ ժամանակ դաշնային և խորհրդարանական հարցերի նախարարն էր և համակարգում էր կառավարության սոցիալական կոմիտեի աշխատանքը։ OCCRP-ն հայտնել է, որ երկու քաղաքական գործիչներից ոչ մեկի հետ անմիջապես կապ հաստատել՝ մեկնաբանություն ստանալու համար, չի հաջողվել։

Ենթադրյալ հողափոխանակումը

Հանձնաժողովը պնդում է, որ 2009-ին, երբ Նեպալը վարչապետ էր, պաշտոնյաները հավանություն են տվել կեղծ առաջարկություններին, որոնք ընկերությանը թույլ են տվել Բիրատնագարում գտնվող գրեթե 3 հեկտար արժեքավոր հողատարածքը փոխանակել գյուղական ավելի էժան հողի հետ։

Նեպալի կառավարությունն առաջարկն ուղարկել է Ռիջալի կոմիտե, որը նույն տարվա դեկտեմբերին հաստատել է փոխանակումը։ Հանձնաժողովը պնդում է, որ շահերի բախում է եղել, քանի որ Ռիջալն ազգակցական կապ ունի ընկերության տնօրենների հետ։

Կոռուպցիայի կանխարգելման մասին օրենքի հիման վրա հանձնաժողովը պահանջում է ազատազրկում և ենթադրյալ վնասին համարժեք տուգանքներ, ինչպես նաև Սունսարի և Մորանգ շրջաններում ընկերության անունով գրանցված մոտ 40 հեկտար հողի բռնագրավում։ Մահացած պաշտոնյաներին գործի մեջ են ներառել՝ նրանց ժառանգությունից գումարների բռնագանձումը դյուրացնելու համար։

Նեպալը, որը կառավարությունը ղեկավարել է 2009-ից 2011 թվականներին, այժմ Նեպալի կոմունիստական կուսակցության համահամակարգողն է։ Ռիջալը Նեպալի կոնգրես կուսակցության բարձրաստիճան առաջնորդներից է։ Նեպալի դեմ շարունակվում է նաև կոռուպցիայի առանձին գործ՝ հնդիկ յոգայի գուրու Բաբա Ռամդևին պատկանող Patanjali Yogpeeth Nepal ընկերությանը տրամադրված հողատարածքի գործարքում ենթադրյալ խախտումների առնչությամբ։

Ինչ ընթացք կունենա դատական գործը

Հատուկ դատարանի տեղեկատվության պատասխանատու Պարվատի Հիթանն ասել է, որ ծանուցագրերի ուղարկումը նախատեսված էր սկսել նոյեմբերի 4-ին։ Մեղադրյալները ներկայանալու համար կունենան 15 օր՝ ժամկետը 7 օրով երկարաձգելու հնարավորությամբ։ Նրանցից ոչ ոք ձերբակալված չէր։

Հիթանն ասել է, որ դատարանը մեղադրյալների ներկայանալուց հետո կարձանագրի նրանց ցուցմունքները։ Դրան կհետևեն լսումները, վկաների ցուցմունքների և ապացույցների ներկայացումը, որից հետո դատական կազմը վերջնական որոշում կկայացնի։