«Մարքի Մունի» կիթառահար Ռիչարդ Լլոյդը մահացել է 75 տարեկանում

Նոյեմբերի 7-ին, 2026 թվականին, Թենեսի նահանգի Չաթանուգա քաղաքի իր տանը մահացել է «Թելեվիժն» խմբի կիթառահար Ռիչարդ Լլոյդը, որի նվագը նպաստել է «Մարքի Մուն» ալբոմի ձևավորմանը։ Նա 75 տարեկան էր։ Մահվան պատճառը լեղուղիների քաղցկեղն էր, գրել է Variety-ն՝ հղում անելով The New York Times-ին։

Լլոյդն ու խմբի առաջատար Թոմ Վերլենը «Թելեվիժնում» բարդ կիթառային մենանվագներ էին կատարում։ Նյու Յորքում ստեղծված խումբն առնչվում էր փանկ տեսարանին, սակայն հայտնի էր երգերի անսովոր կառուցվածքով։ Նրա առաջին երկու ալբոմները՝ «Մարքի Մունը» և «Ադվենչերը», հայտնվել են Մեծ Բրիտանիայի լավագույն տասնյակում։

«Սի Բի Ջի Բի»-ից մինչև մենակատարի կարիերա

«Թելեվիժնը» ստեղծվել է 1973 թվականին և նպաստել «Սի Բի Ջի Բի» ակումբի կայացմանը։ Ստորին Մանհեթենում գտնվող ակումբը հետագայում դարձել է նոր ձևավորվող փանկ տեսարանի կենտրոններից մեկը։ Variety-ի հաղորդմամբ՝ «Թելեվիժնին» ակումբում հաջորդել են «Ռամոնզը», «Բլոնդին» և «Թոքինգ Հեդսը»։ 1977 թվականի փետրվարին Elektra Records-ը թողարկել է «Մարքի Մունը»։ Variety-ն գրում է, որ այն ազդել է հետագա այլընտրանքային ռոք խմբերի, այդ թվում՝ «Ար Ի Էմի» և «Սոնիկ Յութի» վրա, իսկ Լլոյդի ներդրումը «Թելեվիժնում» թերագնահատված է համարում։ Պարբերականի բնորոշմամբ՝ Լլոյդն ու Վերլենն իրենց կիթառային համանվագում համապատասխանաբար բերում էին կրակն ու նրբությունը։

Իր հուշերում, որոնցից հատվածներ է մեջբերում LA Times Now-ը, Լլոյդը պատմել է, որ «Վինուս» երգին ավելի խոր հնչողություն տալու համար կիթառի իր պարտիան երկրորդ անգամ ձայնագրել է նոտա առ նոտա։ Նրա խոսքով՝ «Գայդինգ Լայթում» օգտագործել է կիթառի ութ ձայնուղի։

Խումբը ցրվել է 1978 թվականի ապրիլին «Ադվենչերի» թողարկումից կարճ ժամանակ անց, իսկ Լլոյդն ու Վերլենը մենակատարի կարիերա են սկսել։ Լլոյդն իր առաջին մենակատար ալբոմը՝ «Ալքեմին», թողարկել է 1979 թվականին։ «Թելեվիժնը» վերամիավորվել է 1992 թվականին, թողարկել խմբի անունը կրող ալբոմ և հյուրախաղերի մեկնել։

Բացի «Թելեվիժնում» գործունեությունից՝ Լլոյդը թողարկել է 9 մենակատար ալբոմ և նվագել Մեթյու Սուիթի 1991 թվականի «Գըրլֆրենդ» ալբոմում։