Շոտլանդիայի անձրևային անտառի ծրագիրը ստացել է £5,98 միլիոն (մոտ $8 միլիոն)

Ազգային վիճակախաղի ժառանգության հիմնադրամը £5,98 միլիոն (մոտ $8 միլիոն) է հատկացրել Our Rainforest Futures-ին։ Հնգամյա ծրագիրը նպատակ ունի վերականգնել Շոտլանդիայի անձրևային անտառը և տեղացիներին դրա վերականգնման աշխատանքներին մասնակցելու հնարավորություն տալ։

Անձրևային անտառից մնացել է մոտ 30 000 հեկտար։ Արևմտյան ափի խոնավ անտառներում աճում են միջազգային նշանակություն ունեցող քարաքոսեր, մամուռներ և լյարդամամուռներ, սակայն պահպանված անտառներին սպառնում են եղջերուների և անասունների գերարածեցումը, ինվազիվ բույսերն ու հիվանդությունները։

Վերապատրաստում և աշխատանք երեք կենտրոններում

Դրամաշնորհը կօգնի կենտրոններ ստեղծել Տորիդոնում, Մորվերնայում և կենտրոնական Արգայլում։ Տեղացիները բնական միջավայրի վերականգնման, եղջերուների պոպուլյացիայի կառավարման և ինվազիվ տեսակների հեռացման աշխատանքներում վերապատրաստվելու և աշխատելու հնարավորություն կունենան, հայտնել է BBC-ն։

• Տորիդոն՝ Քինլոխյու, Շիլդեյգ, Լոխկարոն, Էփլկրոս և Գերլոխ։
• Մորվերնա՝ Լոխալին, Ստրոնշան և Մալ կղզու Տոբերմորի։
• Կենտրոնական Արգայլ՝ Քրինան, Թեյվալիխ, Լոխգիլփհեդ, Արդրիշեյգ և Տարբերտ։

Alliance for Scotland’s Rainforest-ի ծրագիրը ղեկավարում է Woodland Trust Scotland-ը։ Գործընկերների թվում են Argyll Countryside Trust-ը, Community Woodlands Association-ը, Plantlife-ը, RSPB Scotland-ը և Scotland’s Rural College-ը, որն անձրևային անտառի տարածքում գտնվող համայնքների համար վերապատրաստման դասընթացներ կմշակի և կանցկացնի։

Plantlife-ի Saving Scotland’s Rainforest ծրագրի ղեկավար Ջուլի Սթոունմանն ասել է, որ ծրագրի շրջանակում հույս ունեն ստեղծել ավելի քան 20 աշխատատեղ և 15 հաստիք՝ վերապատրաստվողների համար։ Նրա խոսքով՝ ծրագիրը կառաջարկի հավատարմագրված և ոչ պաշտոնական վերապատրաստում, այդ թվում՝ էկոլոգիական հետազոտությունների ոլորտում, ինչպես նաև դրամաշնորհներ ու խորհրդատվություն՝ համայնքների նախաձեռնած ծրագրերի համար, և կամավորությամբ զբաղվելու ու սովորելու հնարավորություններ։