Սոմալին ԱՄԷ դեսպանին կարգադրել է հեռանալ 72 ժամվա ընթացքում


Սոմալին նաև խորհրդակցությունների համար հետ է կանչել Աբու Դաբիում իր դեսպանին՝ Սոմալիի տարածաշրջանային վարչակազմերի հետ ԱՄԷ-ի հարաբերությունների շուրջ վեճի խորացման պայմաններում։
Նոյեմբերի 19-ին Սոմալին Արաբական Միացյալ Էմիրությունների դեսպանին կարգադրել է հեռանալ երկրի տարածքից 72 ժամվա ընթացքում և խորհրդակցությունների համար հետ է կանչել Աբու Դաբիում իր դեսպանին։ Որոշումներն ընդունվել են վարչապետ Համզա Աբդի Բարրեի նախագահությամբ կառավարության նիստում։
Սոմալին հունվարի 12-ին որոշել էր դադարեցնել ԱՄԷ-ի հետ իր համաձայնագրերը, այդ թվում՝ նավահանգիստների, պաշտպանության և անվտանգության ոլորտներում՝ վկայակոչելով իր ինքնիշխանության ենթադրյալ խախտումները։ Սոմալիի ինքնակառավարվող երեք տարածաշրջան մերժել էր այդ որոշումը։
Տեղեկատվության նախարար Աբդիֆաթահ Կասիմ Մոհամուդը Սոմալիի ինքնիշխանության ենթադրյալ խախտումներն ԱՄԷ-ի կողմից անվանել է «բացահայտ ներխուժում»։ Նա չի հստակեցրել, թե ինչ գործողություններ են դեսպանին հեռանալու կարգադրության պատճառ դարձել, գրել է CNA-ն։
«Միջոցներ կձեռնարկվեն բոլոր նրանց դեմ, ովքեր համագործակցում են ԱՄԷ-ի հետ Սոմալիի դեմ ներխուժման գործում»։
Նախագահ Հասան Շեյխ Մոհամուդը նոյեմբերի 17-ի իր ելույթում մեղադրել է ԱՄԷ-ին տարածաշրջանային կառավարություններին տնտեսական և քաղաքական աջակցություն տրամադրելու մեջ, որպեսզի նրանք ընդդիմանան դաշնային կառավարությանը։ Նա նաև պնդել է, որ տարածաշրջանային վարչակազմերի հետ նավահանգիստների վերաբերյալ համաձայնագրեր են ստորագրվել առանց դաշնային կառավարության մասնակցության, և ռազմական բազաներ ու ուժեր են ստեղծվել ազգային հրամանատարության ենթակայությունից դուրս, հայտնել է պետական SONNA գործակալությունը։
ԱՄԷ նախագահի դիվանագիտական հարցերով խորհրդական Անվար Գարգաշը ելույթն անվանել է հարձակում ԱՄԷ-ի վրա, ասել, որ իր երկիրը կանգնած է եղել Սոմալիի կողքին, և ափսոսանք հայտնել, որ Սոմալիում իշխանության շուրջ վեճերը ներքաշվում են տարածաշրջանային տարաձայնությունների մեջ։ ԱՄԷ-ն վաղուց հերքում է Սոմալիի գործերին միջամտելու մեղադրանքները, իսկ նրա արտաքին գործերի նախարարությունը դեսպանին հեռացնելու կարգադրությանն անմիջապես չէր արձագանքել։
Հունվարյան որոշումը մերժել են Սոմալիից անկախություն հռչակած Սոմալիլենդը Սոմալիի կազմում ինքնահռչակ ինքնավար Փունթլենդ տարածաշրջանը և դաշնության անդամ Ջուբալենդ նահանգը։ Ջուբալենդը հայտարարել է, որ անվտանգության և զարգացման ոլորտներում իր համաձայնագրերը կշարունակեն գործել, իսկ Փունթլենդը՝ որ ԱՄԷ-ի հետ իր հարաբերությունները չեն տուժի։
ԱՄԷ-ի DP World ընկերությունը Սոմալիլենդի Բերբերա նավահանգստում 30 տարվա կոնցեսիա ունի, իսկ նրա դուստր ընկերությունը 30 տարվա կոնցեսիա ունի Փունթլենդի Բոսասո նավահանգիստը շահագործելու համար։ Նախագահը նաև Կիսմայոն է նշել այն նավահանգիստների թվում, որոնց վերաբերյալ համաձայնագրերը, նրա խոսքով, կնքվել են դաշնային կառավարությունը շրջանցելով։
ԱՄԷ-ն նախկինում ուսուցանել է Սոմալիի հարյուրավոր զինվորականների և աջակցել նավահանգիստներին ու այլ առևտրային նախաձեռնությունների։ Սոմալիի բարձրաստիճան աղբյուրներն ասել են, որ այն դեռ վճարում է Մոգադիշոյում և դրա շրջակայքում գործող Սոմալիի ռազմական ոստիկանության և հատուկ նշանակության ուժերի շուրջ 3 400 զինծառայողի աշխատավարձն ու ապահովում նրանց նյութատեխնիկական աջակցությունը։
Նոյեմբերի 18-ին Սոմալիի արտաքին գործերի նախարարությունը հայտարարել է, որ արտաքին հարաբերությունների համար պատասխանատու է միայն դաշնային կառավարությունը, և մերժել է օտարերկրյա կողմերի հետ առանց դաշնային կառավարության հավանության կնքված անվտանգության համաձայնագրերը։ Կառավարությունը նախարարությանը հանձնարարել է միջազգային հանրությանը տեղեկացնել այն մասին, ինչն անվանում է Էմիրությունների միջամտություն։
Նիդեռլանդների կառավարությունը կանչել է Ռուսաստանի դեսպանին՝ նոյեմբերի 19-ին ռուսական անօդաչու սարքերով հարձակման հետևանքով Կիևում իր դեսպանատան վնասվելուց հետո։ Անօդաչու սարքն ընկել է դեսպանատան մոտ՝ վնասելով մեքենաները, պահակակետն ու պատուհանները։ Հարձակման հետևանքով վնասվել է նաև Ավստրիայի դեսպանատունը, իսկ Կիևի իշխանությունների տվյալներով՝ զոհվել է 1 մարդ, վիրավորվել՝ 5-ը։
2 րոպե

Ֆիջին ամբողջ երկրում աղետի դրություն է հայտարարել, քանի որ Էլ Նինյոյի հետ կապված երաշտը ճնշում է գործադրում ջրի պաշարների վրա։ Տոնգան նույնպես ամբողջ երկրում 27-օրյա արտակարգ դրություն է հայտարարել՝ երաշտի հետևանքների հաղթահարման օգնությունը համակարգելու համար։
3 րոպե

Վարչապետ Նիկոլ Փաշինյանն ասում է՝ եթե ընտրողները հաստատեն նոր Սահմանադրությունը, ինքը կշարունակի Ադրբեջանի հետ խաղաղության օրակարգը և հաջորդ ընտրություններին որպես վարչապետի թեկնածու չի առաջադրվի։ Մերժման դեպքում նա խոստանում է անմիջապես հրաժարական տալ։
3 րոպե