Հարավային Կորեան պարտատոմսերի 15 դիլերի տուգանել է 1,6 տրիլիոն վոնով

Հարավային Կորեայի արդար առևտրի հանձնաժողովը պետական պարտատոմսերի աճուրդներում համաձայնեցված գործողությունների համար ընդհանուր 1,6 տրիլիոն վոնով ($1,2 միլիարդ) տուգանել է 15 տեղական բանկի ու բրոքերային ընկերության, գրել է CNA Business-ը։ Հանձնաժողովը հայտնել է, որ այդ գործողություններն արհեստականորեն բարձրացրել են Հարավային Կորեայի պարտատոմսերի եկամտաբերությունը՝ այն եկամուտը, որը ներդրողները ստանում են պարտատոմսերը պահելու դիմաց։

Գործը վերաբերում է առաջնային դիլերներին՝ ընկերություններին, որոնք պետական արժեթղթերն ուղղակիորեն գնում են կառավարությունից՝ այլ ներդրողներին վերավաճառելու համար՝ այդպիսով պետական արժեթղթերի շուկայում հանդես գալով որպես մարքեթ մեյքերներ։ Հանձնաժողովը հայտնել է, որ 2020-ի հունվարից մինչև 2023-ի հունիսն ընկած ժամանակահատվածում պետական պարտատոմսերի 150 աճուրդի ժամանակ դիլերները տեղեկություններ են փոխանակել այն եկամտաբերության մասին, որն առաջարկելու էին հայտերում։

Տեղեկությունները փոխանակվել են հեռախոսով կամ Telegram հաղորդագրությունների հավելվածով՝ աճուրդների վերջնաժամկետից մեկ կամ երկու րոպե առաջ։ Այդ աճուրդներից 145-ում դիլերներն ուղղակիորեն համաձայնեցրել են հայտերում առաջարկվող եկամտաբերությունն ու ծավալները՝ այն գումարները, որոնց համար հայտեր էին ներկայացնելու, հայտնել է հանձնաժողովը։

Հանձնաժողովը հայտնել է, որ ակնկալում է՝ տուգանքները կնպաստեն պարտատոմսերի աճուրդներում արդյունավետ մրցակցությանը և ավելի արդյունավետ կդարձնեն երկրի պետական ֆինանսների կառավարումը։