Իսպանիայի դատարանն ազատ է արձակել ամերիկացի մեդիաժառանգ Ֆերգի Չեմբերսին


Ամերիկացի մեդիաժառանգը բանտից դուրս է եկել նոյեմբերի 20-ին՝ այն բանից հետո, երբ դատարանը կասեցրել է նրա արտահանձնման մասին որոշումը։ Իսպանիայում նրա ապաստանի դիմումը նույնպես դեռ լուծում չի ստացել։
Իսպանիայի ազգային դատարանն ազատ է արձակել Ջեյմս «Ֆերգի» Չեմբերսին՝ չնայած Իսպանիայի դատախազության առարկությանը։ Դատավորների խոսքով՝ իսպաներեն թարգմանության սխալները կարող են կասկածի տակ դնել ԱՄՆ-ի ներկայացրած փաստաթղթերի ճշգրտությունը, թուլացնել արտահանձնման հիմքերը և հետաձգել որոշումը։ Պաղեստինին աջակցող ամերիկացի բարերար Չեմբերսի ընտանիքին է պատկանում Cox Enterprises-ը։ Նա կալանքի տակ էր հուլիսին ձերբակալվելուց ի վեր։ Հոկտեմբերին դատարանը նրան թողել էր կալանքի տակ՝ փախուստի վտանգ տեսնելով։
Ազատ արձակման պայմանների համաձայն՝ Չեմբերսը պետք է ամեն երկուշաբթի ներկայանա իր բնակության վայրին ամենամոտ դատարան, հանձնի անձնագիրը, չլքի Իսպանիան և բնակության հասցե տրամադրի։ Նա նաև պարտավոր է ներկայանալ Իսպանիայի ազգային դատարան ամեն անգամ, երբ իրեն կանչեն։
Ավելի վաղ՝ ԱՄՆ արդարադատության նախարարությունն ընդունեց Չեմբերսի արտահանձնման թարգմանական սխալները
ԱՄՆ-ի կառավարությունը պնդում է, որ Չեմբերսը լվացել է $7,5 միլիոն, որն, ըստ կառավարության, օգտագործվել է «Համասին» աջակցելու համար։ Արտահանձնման հարցման մեջ նշված են միջազգային փողերի լվացումը, անկարգությունները և անկարգություններ կատարելու նպատակով հանցավոր համաձայնությունը, ոչ թե ահաբեկչության հետ կապված հանցագործությունները։ Չեմբերսը հերքում է, որ որևէ անօրինական արարք է կատարել։ Նրա պաշտպանների խոսքով՝ վիճարկվող փոխանցումներն օրինական էին․ Չեմբերսը Թունիս տեղափոխվելիս սեփական միջոցներն է փոխանցել այնտեղի իր հաշիվներին։
Նիստում իսպանացի դատախազ Խուան Էրնանդես Վիլյալբան պնդել է, որ Չեմբերսին վերագրվող արարքները երկու երկրում էլ հանցագործություն են համարվում, և որ Իսպանիայի օրենսդրությամբ արտահանձնման պահանջները բավարարված են։ Նախկին դատավոր Բալթասար Գարսոնի գլխավորած պաշտպանական կողմը պնդում է, որ անկարգություններ կատարելու նպատակով հանցավոր համաձայնությունն Իսպանիայի օրենսդրության մեջ համարժեք չունի, իսկ բողոքի ցույցերի հետ կապված մեղադրանքներով նախատեսված պատիժը չի հասնում արտահանձնման համար պահանջվող նվազագույն շեմին։
ԱՄՆ արդարադատության նախարարությունն ընդունել է, որ արտահանձնման հարցումը հիմնավորող՝ FBI-ի գործակալի երդմամբ տված գրավոր ցուցմունքի իսպաներեն թարգմանության մեջ 3 էական սխալ կա։ Նախարարությունը հայտնել է, որ սխալները միտումնավոր չեն եղել։ Չեմբերսի պաշտպանների խոսքով՝ իրենց փորձագետը հայտնաբերել է մինչև 30 փոփոխություն, որոնց պատճառով մեղադրանքներն ավելի ծանր են թվում։ Պաշտպանական կողմը պնդում է, որ թարգմանությունը դիտավորյալ և անբարեխղճորեն է փոփոխվել։
Իռլանդիայում Չեմբերսի և նրա զուգընկերուհու՝ Ստելլա Շնաբելի փաստաբան Կիրան Մալհոլանդը The Guardian-ին ասել է, որ նոյեմբերի 18-ին Իռլանդիայի ոստիկանությունն ԱՄՆ-ի իշխանությունների խնդրանքով խուզարկել է զույգին պատկանող տունը Դուբլինում։ Նրա խոսքով՝ ոստիկանները ջարդել են տան մուտքի դուռը և տարել էլեկտրոնային սարքեր ու այլ իրեր։
Մալհոլանդն ասել է, որ ԱՄՆ-ը փոխադարձ իրավական օգնության հարցում է ուղարկել՝ պաշտոնապես օգնություն խնդրելով իրավական գործով։ Նրա պնդմամբ՝ նման հարցումը «[Գարդային] թույլ չի տա ոտքով ջարդել Իռլանդիայում որևէ մեկի տան դռները»։ Փաստաբանն իշխանություններից խնդրել է տրամադրել խուզարկության թույլտվությունն ու ոստիկանների տարած իրերի մանրամասն ցուցակը։
Դատարանի որոշման մեջ, որին ծանոթացել է elDiario.es-ը, դատավորներն Իսպանիայի դատախազությանը խնդրել են մինչև արտահանձնման վերաբերյալ որոշումը պատասխանել պաշտպանության երկու միջնորդություններին՝ լսել պաշտպանության թարգմանության փորձագետին և նոր թարգմանություն պատվիրել։
Իսպանիան չի կարող արտահանձնել Չեմբերսին, քանի դեռ նրա ապաստանի դիմումի վերաբերյալ որոշում չի կայացվել։ Եթե նրան ապաստան տրամադրվի, նա չի կարող արտահանձնվել Միացյալ Նահանգներին։ Եթե դիմումն ի վերջո մերժվի, ԱՄՆ-ին դեռ անհրաժեշտ կլինի դատարանի համաձայնությունն արտահանձնման համար։ Չեմբերսի փաստաբաններն ասել են, որ կբողոքարկեն նման որոշումը, իսկ Իսպանիայի կառավարությունը նույնիսկ այդ դեպքում կարող է հրաժարվել նրան արտահանձնելուց։
Նախարարությունն ընդունել է, որ Իսպանիային ուղարկված ՀԴԲ-ի երդվյալ հայտարարության թարգմանությունում երեք էական ոչ միտումնավոր սխալ է եղել։ Ջեյմս «Ֆերգի» Չեմբերսի պաշտպանությունը դատարանից խնդրել է կասեցնել վարույթը և նոր թարգմանություն ստանալ։
3 րոպե