Ֆլորիդայի ափերի մոտ SS United States-ը խորտակել են՝ արհեստական խութ ստեղծելու համար

Նոյեմբերի 11-ին Ֆլորիդա նահանգի Դեստին քաղաքի ափերի մոտ միտումնավոր խորտակել են SS United States-ը՝ նախկին օվկիանոսային նավը վերածելով արհեստական խութի։ Սոնարով և հեռակառավարվող ստորջրյա սարքով առաջին զննումները ցույց են տվել, որ նավը ծովի հատակին կանգնել է ուղղաձիգ՝ նախատեսված վայրից ընդամենը մի քանի ոտնաչափ հեռավորության վրա։

Նավը տարիներ շարունակ խարսխված էր Ֆիլադելֆիայում այն բանից հետո, երբ այն թանգարանի կամ լողացող հյուրանոցի վերածելու առաջարկները ձախողվել էին։ Դաշնային դատարանը կարգադրել էր հեռացնել այն նավակայանից, և այլ տեղ կամ իրագործելի նախագիծ չգտնելու դեպքում նավին ջարդոնի վերածվելու վտանգ էր սպառնում։ Օկալուսա շրջանը 2024 թվականի հոկտեմբերին ձեռք էր բերել այն՝ քանդելու փոխարեն խութի վերածելու համար։

Նավի նախապատրաստումը խորտակմանը

Շրջանի իշխանությունների տեղեկացմամբ՝ աշխատողները դատարկել և մաքրել են նավի վառելիքի ու քսանյութերի բաքերը, ինչպես նաև բնապահպանական մաքրման աշխատանքներ կատարել բոլոր տախտակամածներում։ Աշխատանքային խմբերը նաև հեռացրել են լուսամուտները և տախտակամածների միջև բացվածքներ կտրել, որպեսզի ծովի ջուրը ներս լցվի։ Նավը խորտակել են վերահսկվող ջրալցմամբ, ոչ թե պայթուցիկներով։

Նավի պահպանման կողմնակիցները վերջին պահին դատարանում բնապահպանական մտահոգություններ են բարձրացրել, սակայն խորտակումը կասեցնելու հրատապ միջնորդությունը մերժվել է, գրել է gCaptain-ը։

Խութ և թանգարան

Օկալուսա շրջանի իշխանությունների խոսքով՝ այս կերպ պատրաստված խութերը ծովային օրգանիզմների համար բնակավայր են ստեղծում և կարող են օգտակար լինել ծովային կյանքին, ձկնորսությանն ու զբոսաշրջությանը։ Վուդս Հոլի օվկիանոսագիտական ինստիտուտի, Դոֆին կղզու ծովային լաբորատորիայի և Լուիզիանայի պետական համալսարանի գիտնականները նախատեսում են հետևել նավի շուրջ կենսաբանական, ֆիզիկական ու քիմիական փոփոխություններին, մինչ ծովային օրգանիզմները բնակություն կհաստատեն դրա վրա։

Նավը շահագործման է հանձնվել 1952 թվականին և առաջին իսկ ուղևորության ժամանակ Ատլանտյան օվկիանոսն անցնելու արագության ռեկորդ սահմանել, որը մինչ օրս ոչ մի օվկիանոսային նավ չի գերազանցել։ Այն շահագործումից հանվել է 1969 թվականին։ Նավի ծխնելույզները, ռադիոտեղորոշիչի կայմն ու այլ առարկաներ պահպանվել են՝ նավի պատմությանը նվիրված ափամերձ թանգարանի և այցելուների համար նախատեսված ցուցադրության համար։