Novo Nordisk-ի դեղը նվազեցրել է բորբոքման ցուցանիշները, բայց ոչ սրտային դեպքերը

Novo Nordisk-ի փորձարարական զիլտիվեկիմաբ դեղը ZEUS փորձարկման ընթացքում նվազեցրել է բորբոքման ցուցանիշները, սակայն այն ստացած հիվանդների շրջանում ինֆարկտների, ինսուլտների կամ մահերի թիվը պակաս չի եղել, քան պլացեբո՝ ոչ ակտիվ միջոց ստացածների շրջանում։

Փորձարկման ելքը հակիրճ ներկայացվել էր հուլիսին։ Լրացուցիչ արդյունքները նոյեմբերի 7-ին ներկայացվել են Չիկագոյում՝ Սրտի ամերիկյան ասոցիացիայի գիտական նստաշրջաններում, և միաժամանակ հրապարակվել New England Journal of Medicine ամսագրում, գրել է STAT-ը։

Բորբոքման ցուցանիշներն ու հիվանդների բուժման ելքերը

ZEUS-ը երրորդ փուլի՝ դեղի փորձարկման ուշ փուլի ուսումնասիրություն էր։ Դրան մասնակցել են հաստատված սրտանոթային հիվանդություն, երիկամների քրոնիկ հիվանդություն և բարձր զգայունությամբ չափված C-ռեակտիվ սպիտակուցի առնվազն 2 mg/L մակարդակ ունեցող հիվանդներ։ Այդ սպիտակուցը բորբոքումը գնահատելու համար չափվող ցուցանիշ է։

Զիլտիվեկիմաբը մոնոկլոնալ հակամարմին է՝ լաբորատորիայում ստեղծված սպիտակուց, որը թիրախավորում է ինտերլեյկին-6-ը (IL-6)՝ բորբոքային ազդակների փոխանցմանը մասնակցող մոլեկուլը, կապվում է դրան և կանխում դրա փոխազդեցությունը IL-6-ի ընկալիչի հետ։ ZEUS փորձարկման ընթացքում դեղը նվազեցրել է IL-6-ի մակարդակը։ Սակայն ցուցանիշի փոփոխությունը պարտադիր չէ, որ կանխատեսի՝ բուժումը կբարելավի արդյոք այնպիսի ելքեր, ինչպիսին ապրելիությունն է։

ZEUS-ի նախնական արդյունքների հրապարակումից հետո Novo Nordisk-ը դադարեցրել է զիլտիվեկիմաբի երկու այլ՝ HERMES և ATHENA փորձարկումները։ Տվյալները վերահսկող հանձնաժողովը սեպտեմբերին եզրակացրել էր, որ այդ փորձարկումները, հավանաբար, հաջողության չեն հասնի։