ԱՄՆ պատերազմի նախարարը թույլատրել է գվարդիային Վաշինգտոնում պարեկային մեքենաներ ու նավակներ օգտագործել

ԱՄՆ պատերազմի նախարար Փիթ Հեգսեթը 2026 թ․ հոկտեմբերի 29-ին հուշագիր է ստորագրել, որով Վաշինգտոնում Ազգային գվարդիայի զինծառայողներին թույլատրվում է օգտագործել մինչև 60 տարբերանշանով պարեկային մեքենա, ռազմական մարտավարական մեքենաներ, այդ թվում՝ Humvee-ներ, նավակներ, մինչև 20 լուսավորության աշտարակ և գեներատոր՝ առանց հաստատելու դրանց տեղակայումը։ Պենտագոնի երկու պաշտոնյա թույլտվության մասին հաստատել են Fox News-ին։ Պատերազմի նախարարության պաշտոնյան էլ ասել է, որ սարքավորումները թույլատրվել են դաշնային և տեղական իրավապահներին աջակցելու համար։

Նախագահ Դոնալդ Թրամփը Վաշինգտոնում հանցավորության դեմ պայքարի առաքելության համար սկսել է Ազգային գվարդիայի զորքեր մոբիլիզացնել 2025-ի օգոստոսին։ Հետագայում՝ 2025-ին, Հեգսեթը նրանց թույլատրել է ծառայողական զենք կրել, երբ առաքելությունը դա պահանջում է։ 2026 թ․ նոյեմբերի 5-ի դրությամբ առաքելությանը կցված էր գվարդիայի 3 084 անդամ։

Ինչ կարող են և չեն կարող անել զինծառայողները

Նախարարությունը հայտնել է, որ սարքավորումներն աջակցում են «Վաշինգտոնը դարձնենք անվտանգ և գեղեցիկ» առաքելությունում գվարդիայի անձնակազմի շարունակական ներգրավմանը։ Թույլատրված ռազմական մեքենաների թվում են թեթև միջին մարտավարական մեքենաները՝ բեռների և անձնակազմի փոխադրման համար օգտագործվող բեռնատարները։

Հուշագրի համաձայն՝ զինծառայողները չեն կարող ձերբակալություններ կատարել, բայց կարող են ժամանակավորապես պահել որևէ անձի՝ տեղական իրավապահներին այդ մասին տեղեկացնելու ընթացքում, գրել է Task & Purpose-ը։ Նրանք պարտավոր են կրել զինվորական համազգեստ և հստակ տարբերվել քաղաքացիական իրավապահներից։

Ուղեցույցի համաձայն՝ նավակների անձնակազմերը կօգնեն ապահովել տարածքի անվտանգությունն ու պաշտպանել իրավապահներին, որոնք Անակոստիա այգու մոտ գործողություններ են իրականացնում հանցախմբերի առաջնորդների կամ թմրանյութերի ապօրինի շրջանառությամբ զբաղվողների դեմ։ Զինծառայողները չեն կարող նավակներում կրակել իրենց ծառայողական զենքով, իսկ նավակում պետք է դաշնային ծառայող լինի՝ ձերբակալության դեպքում աջակցելու համար։ Նրանց նաև չեն կարող սվիններ տրամադրել, իսկ իրենք չեն կարող սարքավորումները համատեղ օգտագործել իրավապահների հետ, հետախուզական գործողություններ կատարել կամ ուղղաթիռներ ու այլ օդանավեր օգտագործել։