Նոր Զելանդիայում նոյեմբերի 7-ին կընտրեն նոր կառավարություն

Նոր Զելանդիայի բնակիչները նոյեմբերի 7-ին պետք է ընտրեն նոր կառավարություն։ Կյանքի թանկացումը, գործազրկությունն ու առողջապահությունը նրանց հիմնական մտահոգություններից են, հայտնել է BBC-ն։

Վարչապետ Քրիստոֆեր Լաքսոնը ձգտում է երկրորդ ժամկետով վերընտրվել։ Նրա Ազգային կուսակցությունը կառավարում է «Նոր Զելանդիան առաջինը» և ACT կուսակցությունների հետ կոալիցիայով։ Լեյբորիստների առաջնորդ Քրիս Հիփկինսը հույս ունի վերադառնալ վարչապետի պաշտոնին՝ 2023 թ․ հոկտեմբերի ընտրություններում իշխանությունը կորցնելուց հետո։

Ինչ են առաջարկում կուսակցությունները

Ազգային կուսակցությունը խոստանում է հարկաբյուջետային կարգապահության միջոցով կրկին ապահովել բյուջեի հավելուրդ՝ միաժամանակ ընդլայնելով ազգային կենսաթոշակային համակարգը։ Լեյբորիստները խոստանում են ավելի մատչելի առողջապահություն ու տրանսպորտ, ներդրումներ աշխատատեղերի, բնակարանաշինության և ենթակառուցվածքների մեջ, ինչպես նաև ավելի ուժեղ հանրային ծառայություններ, հայտնել է Al Jazeera-ն։

Ինչպես են ձայներն ազդում կառավարության ձևավորման վրա

Նոր Զելանդիայի խառը համամասնական ընտրակարգով ընտրողները մեկ քվե տալիս են տեղական թեկնածուին, մյուսը՝ կուսակցությանը։ Կուսակցություններին տրված ձայներն են որոշում խորհրդարանում յուրաքանչյուրի մանդատների ընդհանուր մասնաբաժինը։

Քանի որ խորհրդարանական մանդատները բաշխվում են կուսակցություններին տրված ձայներին գրեթե համամասնորեն, մեկ կուսակցություն հազվադեպ է մեծամասնություն ստանում։ Փոքր կուսակցությունները հաճախ օգնում են որոշել, թե խոշոր կուսակցություններից որն է կառավարելու ընտրություններից հետո։