Հնդկաստանը կեղծ դատական որոշումներով կարգադրել է արգելափակել 129 կայք

Հնդկաստանի հեռահաղորդակցության վարչությունը բարձր դատարանների կեղծ որոշումների հիման վրա ինտերնետային ծառայություններ մատուցողներին կարգադրել է արգելափակել խաղադրույքների 129 կայք, նոյեմբերի 11-ին պարզել է Reuters-ը։ Բացահայտումը վերաբերում է արգելափակման ավելի վաղ տրված կարգադրություններին, ոչ թե կայքերը հեռացնելու նոր հրահանգի, և ոստիկանության քննության պատճառ է դարձել։

Դատարանները ստուգել են ենթադրյալ որոշումները

Reuters-ը ենթադրյալ որոշումներից ոչ մեկը չի գտել դատարանների առցանց գրանցամատյաններում։ Ռաջաստանի բարձր դատարանի գրանցավարն ասել է, որ դատարանի անունը կրող փաստաթուղթը կեղծ է թվում և սերվերում գոյություն չունի։ Ալլահաբադի բարձր դատարանը պարզել է, որ իր անունից տրված որոշումը կեղծ է։ Ոստիկանության փաստաթղթերի համաձայն՝ դատավոր Գարիմա Պրաշադի գրասենյակը հաստատել է, որ նա նման որոշում չի կայացրել, թեև փաստաթղթում նշված է եղել նրա անունը։

Ալլահաբադի դատարանի անունից ներկայացված փաստաթղթի վրա եղել են դատարանի պատկերանշանը, կնիքը և QR կոդ՝ սկանավորվող ծածկագիր, որը սովորաբար օգտագործվում է իսկությունը ստուգելու համար։ Reuters-ը պարզել է, որ կոդը տանում է վեբ էջ, որտեղ միայն գործի համարն է նշված։

Էլեկտրոնային նամակներից մինչև պաշտոնական հրահանգներ

Վարչությունը Ռաջաստանի դատարանի ենթադրյալ որոշումը ստացել է հուլիսի 19-ի էլեկտրոնային նամակով, որը ստորագրված է եղել «Արյան Չաուդհարի» անունով։ Նրան ներկայացրել են որպես դատարանում գործ վարելու իրավասություն ունեցող փաստաբան։ Reuters-ի հարցումն այդ հասցեից հետ է վերադարձվել՝ «Ստացողը չի գտնվել» նշումով, ուստի ուղարկողի ինքնությունը չի հաստատվել։ Փաստաթղթում վկայակոչվել է տեղեկատվական տեխնոլոգիաների մասին Հնդկաստանի օրենքի մի դրույթ, որը թույլ է տալիս հեռացնել բովանդակությունը՝ ի շահ ազգային անվտանգության։ Դրանից հետո վարչությունը մատակարարներին ուղարկել է արգելափակման կարգադրությունը։

Ալլահաբադի դատարանի ենթադրյալ որոշումն ուղարկվել է օգոստոսի 22-ի էլեկտրոնային նամակով, որի հեղինակը ներկայացել է որպես փաստաբան Կարտիկեյ Պանդեյ։ Նամակից հետո պաշտոնյաների միջև գրագրություն է սկսվել, որի ընթացքում, ի թիվս այլնի, պահանջվել է զեկույց ձեռնարկված գործողությունների մասին։ Այնուհետև վարչությունը մատակարարներին հրահանգել է անհապաղ արգելափակել կայքերի հասանելիությունը։ Reuters-ն այդ էլեկտրոնային հասցեից պատասխան չի ստացել, ուստի այդ ուղարկողի ինքնությունը ևս չի հաստատվել։

Reuters-ը նշել է, որ բովանդակության հեռացման գործընթացով անցնող կեղծ որոշումները կարող են ազդել Հնդկաստանում գործող ցանկացած կազմակերպության առցանց ներկայության վրա։ Կառավարությունը պնդում է, որ առցանց բովանդակության հեռացում կարգադրում է միայն հանրային շահերից ելնելով՝ օրենքն ու կարգն ապահովելու համար։

Ոստիկանությունը քննում է անհայտ անձանց գործը

Reuters-ի բացահայտումներից հետո Ալլահաբադի բարձր դատարանը նոյեմբերի 6-ին բողոք է ներկայացրել ոստիկանություն։ Ոստիկանության գործի փաստաթղթերի համաձայն՝ անհայտ անձանց նկատմամբ քննություն է սկսվել ենթադրյալ կեղծիքի և խարդախության գործով։ Ուտար Պրադեշ նահանգի կիբերհանցագործությունների դեմ պայքարի բարձրաստիճան պաշտոնյա Ղանշյամ Յադավը հաստատել է, որ Ալլահաբադի դատարանի որոշումը կեղծ է, և ասել, որ ձերբակալություններ չեն եղել։

Դեռ պարզված չէ, թե ով և ինչպես է պատրաստել կեղծ որոշումները, այդ թվում՝ արդյոք օգտագործվել է գերբանականություն (ԳԲ)։ Հեռահաղորդակցության վարչությունը չի պատասխանել Reuters-ի հարցերին։ Նոյեմբերի 11-ի դրությամբ երկու կեղծ փաստաթղթերն էլ դեռ վարչության կայքում էին, իսկ ոստիկանության քննությունը շարունակվում էր։