Լիբիայի կրոնական մարմինը դեմ է արտահայտվել Nike-ի տարբերանշանով հագուստին

Լիբիայի մայրաքաղաք Տրիպոլիում գործող Դար ալ-Իֆթան ֆեթվա է արձակել, որով մուսուլմաններին արգելում է գնել, վաճառել կամ կրել Nike-ի տարբերանշանով հագուստ։ Որոշումը հաստատել է մեծ մուֆթի Սադըք ալ Ղարիանին, հայտնել է BBC-ն։ Ֆեթվան իսլամական իրավունքի վերաբերյալ կրոնական կարծիք է․ այս որոշումը Nike-ի արտադրանքի պետական արգելք չի հայտարարում և պատիժներ չի սահմանում այն մարդկանց համար, որոնք շարունակում են գնել կամ կրել այն։

Դար ալ-Իֆթան ազդեցիկ կրոնական հաստատություն է Արևմտյան Լիբիայում։ Նրա որոշումները կարող են զգալի հասարակական ազդեցություն ունենալ, սակայն պարտադիր չէ, որ դրանք լինեն կառավարության կարգադրություններ կամ ունենան իրավական ուժ։ 2011-ին Մուամար Քադաֆիի տապալմանը հաջորդած տարիների հակամարտությունից հետո Լիբիայի արևելքում և արևմուտքում գործում են միմյանց հակառակորդ իշխանություններ և հաստատություններ։

Հաստատության հիմնավորումները

Դար ալ-Իֆթան ասել է, որ Nike-ն անվանվել է հաղթանակի հունական աստվածուհու անունով, իսկ նրա թևերը ներշնչել են ընկերության կորագիծ տարբերանշանի ստեղծումը։ Հաստատությունը պնդել է, որ այդ տարբերանշանը ցուցադրելը տարածում է բազմաստվածության՝ մեկից ավելի աստվածների պաշտամունքի հետ կապված խորհրդանիշներ։

Բացի այդ՝ հաստատության կրոնական հանձնաժողովը մեղադրել է Nike-ին Իսրայելին աջակցելու մեջ և կոչ արել բոյկոտել այդ երկրին աջակցող ընկերություններին։ Որոշման մեջ հղում է արվում Դար ալ-Իֆթայի Հետազոտությունների և շարիաթի ուսումնասիրությունների խորհրդի՝ 2023 թ․ նոյեմբերի 5-ին հրապարակած հայտարարությանը։ Դրանում մուսուլմաններին կոչ էր արվում բոյկոտել արևմտյան այն ընկերություններին, որոնք խորհուրդը համարում էր Գազայում պատերազմի ընթացքում Իսրայելին աջակցող։

2025-ին Դար ալ-Իֆթան դեմ է արտահայտվել Van Cleef & Arpels-ի տարբերանշանով զարդեր և ժամացույցներ կրելուն։ Հաստատությունը պնդել է, որ շքեղ զարդեր արտադրող ընկերության քառատերև երեքնուկի պատկերն առնչվում է քրիստոնեական հավատալիքներին և հաջողության ձգտմանը, որոնք, իր խոսքով, հակասում են իսլամական ուսմունքին։

Nike-ի արտադրանքը Լիբիայում

Nike-ն Լիբիայում պաշտոնական խանութ չունի, սակայն սպորտային հագուստի տեղական վաճառողները վաճառում են ընկերության ապրանքանիշով արտադրանք։ Nike-ի հագուստը երկրում տարածված է, թեև շատ ապրանքներ կեղծ են։ BBC-ն մեկնաբանության համար դիմել է Nike-ին։