Պատգամավորներ․ Վեստմինստերի պահպանման ծախսը շաբաթական £1,5 միլիոն է

Վեստմինստերյան պալատի պահպանումը շաբաթական մոտ £1,5 միլիոն է արժենում, իսկ առանց միջոցներ ձեռնարկելու ծախսը, սպասվում է, կհասնի £2 միլիոնի, հայտնել է Մեծ Բրիտանիայի Համայնքների պալատի պետական հաշիվների հանձնաժողովը։ Հանձնաժողովի գնահատմամբ՝ անգործության յուրաքանչյուր տարին վերականգնման ծրագրի ծախսերին ավելացնում է £420 միլիոն։

Շենքի վերականգնման ձևի ու ժամկետների վերաբերյալ որոշումները, որոնք դիտարկվում են որպես պատգամավորների և Լորդերի պալատի անդամների, այլ ոչ թե կառավարության որոշելիք հարց, բազմիցս հետաձգվել են՝ աշխատանքների շուրջ տարաձայնությունների և աճող ծախսերի պատճառով։ Հանձնաժողովի նախագահ, պատգամավոր սըր Ջեֆրի Քլիֆթոն-Բրաունը որոշումներ կայացնելու նկատմամբ վերաբերմունքը բնութագրել է որպես «քաղաքական ալերգիա», գրել է The Guardian-ը։

Խափանումներ և հրդեհի վտանգ

Պալատում ջրամատակարարման համակարգը պարբերաբար խափանվում է, տանիքներից ջուր է կաթում, իսկ քարաշարը քայքայվում է։ Ընկնող բեկորներից պաշտպանվելու համար փայտամածներ են տեղադրվել։ Հրդեհի մշտական վտանգի հիմնական աղբյուրը հնացած էլեկտրական համակարգն է, և հրդեհային պարեկները շուրջօրյա հերթապահում են։

Քլիֆթոն-Բրաունը զգուշացրել է, որ խոշոր հրդեհը կարող է ոչնչացնել ժառանգությունը, վնասվածքների կամ մարդկային զոհերի պատճառ դառնալ։ Խորհրդարանի խոսնակը ողջունել է հանձնաժողովի ուսումնասիրությունը և ասել, որ աշխատակիցների ու այցելուների անվտանգությունն ապահովելու աշխատանքներ համալիրի ողջ տարածքում արդեն ընթացքի մեջ են։

Մնացել է երկու տարբերակ

Չորս առաջարկից մնացել է երկու տարբերակ, որոնցից պատգամավորները պետք է ընտրություն կատարեն․ հանձնաժողովը հայտնել է, որ վերականգնման որևէ կոնկրետ ծրագիր առաջարկելն իր դերը չէ։ Աղյուսակում ներկայացված են որոշման սպասող տարբերակների գնահատականները, ոչ թե հաստատված ծախսերը։

Ամբողջական տեղափոխության դեպքում աշխատակիցները կտեղափոխվեն համալիրի հյուսիսային կողմում գտնվող շենքեր, Համայնքների պալատը՝ մոտակա Ռիչմոնդ Հաուս, իսկ Լորդերի պալատը՝ Եղիսաբեթ Երկրորդի անվան կոնֆերանսների կենտրոն։ Փուլային տեղափոխության դեպքում Համայնքների պալատը մինչև 2 տարով կտեղափոխվի Լորդերի պալատի նիստերի դահլիճ։

Հանձնաժողովը կասկածի տակ է դնում ժամանակավոր տարածքների հասանելիությունը և դրանց գնահատված արժեքի ողջամտությունը՝ մտահոգվելով, որ ծրագիրը հարմարեցվում է հասանելի տարածքներին, փոխանակ տարածքները տրամադրվեն ծրագրի կարիքներին համապատասխան։

Առաջարկություններ՝ որոշումից առաջ

Հանձնաժողովը խորհուրդ է տալիս Համայնքների և Լորդերի պալատների քարտուղարներին, որոնք անվանապես ղեկավարում են գործընթացը, 6 ամսվա ընթացքում խորհրդարանականներին ներգրավելու ծրագիր ներկայացնել։ Հանձնաժողովի խոսքով՝ մինչ այժմ խորհրդարանականների ներգրավումը բավարար չի եղել։

Հանձնաժողովը նաև կոչ է անում ավելի հիմնավոր գնահատել ծախսերը, ժամանակացույց կազմել՝ 2030-ին հիմնական ծրագրի վերաբերյալ որոշում կայացնելու համար, և ավելի հրատապ աշխատանքներ տանել ժամանակավոր տարածքների հարցը վերջնականապես լուծելու ուղղությամբ։ Այն խորհուրդ է տալիս պարզեցնել կառավարումը և ստեղծել վերականգնման ու նորացման հարցերով նոր հատուկ հանձնաժողով՝ բարձրաստիճան պաշտոնյաներից հաշվետվություն պահանջելու համար։