South East Water-ի Արդինգլի ջրամբարը լցված է 19%-ով։ Շրջակա միջավայրի գործակալության գնահատմամբ՝ երաշտի ավարտի համար առաջիկա վեց ամիսներին միջինից 20%-ով ավելի տեղումներ են անհրաժեշտ։
Շրջակա միջավայրի գործակալության տվյալներով՝ Անգլիայի 82%-ում երաշտը շարունակվում է, թեև «Օսթեն» և «Բոելո» փոթորիկները կարճատև թեթևացում են բերել։
2026-ին Մեծ Բրիտանիայում գրանցվել է դիտարկումների պատմության ամենաշոգ ամառը․ ծայրահեղ շոգի և սակավ տեղումների հետևանքով ջրի պաշարները նվազել են։ Հոկտեմբերին Դևոնի, Քորնուոլի, Դորսեթի, Սոմերսեթի, Արևելյան և Արևմտյան Սասեքսի որոշ հատվածներում սաստիկ երաշտ է հայտարարվել։ Դա երաշտի ամենաբարձր մակարդակն է․ այն նշանակում է, որ լուրջ վնաս արդեն հասցվում է կամ մոտալուտ է, և մարդկանց, ջրամատակարարումը, շրջակա միջավայրը կամ այլ կենսական ծառայությունները պաշտպանելու համար արտակարգ միջոցներ են անհրաժեշտ։
South East Water-ի Արդինգլի ջրամբարը ջուր է մատակարարում Սասեքսի Հեյվարդս Հիթ և Աքֆիլդ քաղաքների ու հարակից տարածքների մոտ 95 000 շենքի, գրել է Guardian-ը։ Շրջակա միջավայրի գործակալության գնահատմամբ՝ տարվա այս ժամանակ ջրամբարները պետք է լցված լինեն մոտ 75%-ով։
| Ջրամբար | Ջրամատակարար ընկերություն | Լցվածություն |
|---|---|---|
| Արդինգլի | South East Water | 19% |
| Ուիմբլբոլ | South West Water | 14,5% |
| Southern Water |
| 80% |
Հեյվարդս Հիթի բնակիչ Քերոլայն Ալանն ասել է, որ չի հիշում՝ Արդինգլիի ջրի մակարդակն այդքան ցածր եղած լինի, և մտահոգություն է հայտնել, որ տարածքի աճին զուգահեռ ջրի պահեստավորման ծավալը չի ավելանում։ Նույն քաղաքի բնակիչ Գրեհեմ Ուորդն ասել է, որ ենթակառուցվածքն այլևս չի ծառայում իր նպատակին, և մտավախություն է հայտնել, որ շոգ ամառների շարունակվելու դեպքում խնդիրները կկրկնվեն։ Դելֆին Հեյզելդոնը նույնպես ասել է, որ երբեք ջրամբարի մակարդակն այդքան ցածր չի տեսել, և մտահոգվել է իր երեխաների ու թոռների ջրային ապահովությամբ։
Southern Water-ը հայտնել է, որ 2018-ին Ուիր Վուդի ջրի մաքրման կայանը հանել է մատակարարման համակարգից, քանի որ դրա շահագործման ժամկետն ավարտվել էր, իսկ հուսալիության և ջրի որակի հետ կապված լուրջ խնդիրներ կային։ Այն փոխկապակցված ցանցով արդեն ջուր է մատակարարում South East Water-ին, սակայն Ուիր Վուդի մաքրման կայանի շահագործումը չէր լուծի Արդինգլիի ներկայիս խնդիրը։
Շրջակա միջավայրի գործակալության գնահատմամբ՝ երաշտի ավարտի համար առաջիկա վեց ամիսներին միջինից 20%-ով ավելի տեղումներ են անհրաժեշտ։ Գործակալության գլխավոր տնօրեն Ֆիլիպ Դաֆին BBC-ի հրապարակած մեկնաբանությունում ասել է, որ մի քանի անձրևոտ օրը չի կարող վերացնել ամիսներ տևած շոգ և չոր եղանակի հետևանքները։ Գետերի, ջրամբարների և ստորերկրյա ջրերի՝ հողի տակ կուտակված ջրի պաշարների վերականգնման համար տևական անձրևներ են անհրաժեշտ։
BBC-ն կանխատեսում է հիմնականում չոր եղանակ․ առնվազն տասը օր Մեծ Բրիտանիայի վրա կամ մոտակայքում բարձր ճնշման գոտի կպահպանվի՝ արգելափակելով մոտեցող եղանակային համակարգերը։ Տեղ-տեղ հնարավոր է մաղող անձրև, բայց սպասվող տեղումների քանակն աննշան կլինի։ Ավելի երկարաժամկետ՝ երեք ամսվա կտրվածքով, Օդերևութաբանական ծառայության կանխատեսման համաձայն՝ սովորականից ավելի խոնավ եղանակի հավանականությունը կրկնակի է։
Երաշտի հարցերով ազգային խմբի վերջին հանդիպումից հետո ջրամատակարար ընկերություններին հորդորում են ավելի արագ վերացնել արտահոսքերը։ Տնային տնտեսություններին խնդրում են ավելի կարճ ցնցուղ ընդունել և ատամները լվանալիս փակել ծորակները։ Մեծ Բրիտանիայի ջրային հարցերի նախարար Էմմա Հարդին, որը նախագահել է հանդիպումը, ընկերություններին հորդորել է ձեռնարկել բոլոր հասանելի միջոցները՝ ներկայիս մատակարարումները պաշտպանելու և գարնանը նախապատրաստվելու համար։
2025-ի երաշտի ժամանակ South East Water-ն առաջարկել էր Արդինգլին և Ուիր Վուդը միացնել վերգետնյա արտակարգ խողովակաշարով, սակայն անձրևների շնորհիվ իրավիճակի մեղմացումից հետո հետաձգել էր ծրագիրը։ Այժմ ընկերությունն ուսումնասիրում է ջրամբարները միացնող ստորգետնյա խողովակաշարի իրագործելիությունը։ Southern Water-ը նպատակ ունի մինչև 2030-ը վերակառուցել Ուիր Վուդի մաքրման կայանը։ Ընկերության խոսքով՝ նախագիծը նախատեսված է կլիմայի փոփոխության և բնակչության աճի պայմաններում Հյուսիսային Սասեքսի երկարաժամկետ ջրային անվտանգությունն ամրապնդելու համար։
Գերատեսչությունը տասնամյակների ընթացքում ամենաքիչ նոր հետազոտական դրամաշնորհներն է հատկացրել, բայց ասում է, որ օրենքով դեռ ժամանակ ունի հաստատված գումարը ծախսելու համար։
2 րոպե
Պերուի մշակույթի նախարարության կազմակերպած սուզումների ընթացքում հայտնաբերվել են նաև բնակավայրի ջրածածկ պատեր և ինկերին վերագրվող առարկաներ, որոնք նոր տեղեկություններ են տալիս ափամերձ բնակավայրի կառուցվածքի մասին։
3 րոպե
ՆԱՍԱ-ն ընկերություններից տեղեկություններ է խնդրում «Հաբլի» ուղեծիրը բարձրացնելու, այն սպասարկելու կամ անվտանգ հեռացնելու հնարավորությունների մասին։ Պատասխանները սպասվում են մինչև 2026 թ․ նոյեմբերի 30-ը։
3 րոպե
