Պոմպեյի պահարաններից մեկում հնագետներն անձնական իրեր են գտել

Պոմպեյի Վիա դելլ’Աբոնդանցա փողոցի տներից մեկի փայտե պահարանում հնագետները գտել են երեխայի կախազարդերով վզնոց, անձնական խնամքի պարագաներ և դրամ։ Ք.հ. 79 թվականին Վեզուվի ժայթքումից ի վեր փակ մնացած պահարանում պահպանվել են բնակիչների առօրյայի և հնարավոր առևտրային գործունեության հետքեր։

Տան ճակատն առաջին անգամ պեղվել է 1912 թվականին, իսկ այժմ հնագետները լայնածավալ վերականգնման ծրագրի շրջանակում ուսումնասիրում են դրա որոշ սենյակներ, գրել է The Guardian-ը։ Տունն ավանդաբար կապվում է Կոռնելիուս Մաքսիմուսի անվան հետ՝ այժմ այլևս չերևացող արձանագրությունների պատճառով։

Վզնոց, որը կարող էր օգնել ճանաչել երեխաներին

Վզնոցը պատկանում է կրեպունդիա կոչվող տեսակին, որն ավանդաբար երեխաներն էին կրում։ Դրա կախազարդերը չխկչխկում էին՝ օգնելով ծնողներին հետևել երեխաներին, ինչպես նաև կարող էին օգնել ճանաչել նրանց։

Պոմպեյի հնագիտական պարկի նկարագրությամբ՝ կախազարդերը պատրաստված են, ի թիվս այլ նյութերի, ոսկորից, ապակե մածուկից և լեռնային բյուրեղից ու ունեն անցքեր՝ դրանք կախելու համար։ Դրանք պատկերում են ձեռքեր, ոտքեր, սոճու կոներ, խաղողի ողկույզներ, ինչպես նաև Բես և Մերկուրի աստվածներին։ Բեսը հին եգիպտական աստվածություն էր՝ ընտանիքների, մասնավորապես մայրերի, երեխաների և ծննդաբերության հովանավորը։ Մերկուրին հռոմեական աստված էր՝ կապված առևտրի, հաղորդակցության և ճանապարհորդների հետ։

Պարկի տնօրեն Գաբրիել Ցուխտրիգելն ասել է, որ կրեպունդիան կարող էր երեխաներին հիշեցնել հեռվում ապրող ծնողների մասին։ Նա այդ վզնոցների նշանակությունը կապել է Միջերկրական ծովի ավազանում մարդկանց տեղաշարժի և իրենց հետ անձնական իրեր տանելու սովորության հետ։

Անձնական խնամք և հնարավոր առևտուր

Անձնական խնամքի պարագաների թվում էին օծանելիքի փոքր ապակե սրվակ, ունելի և կոտիկուլա՝ գունանյութերը խառնելու գործիք։ Պահարանում կային նաև ճաշ պատրաստելու ամաններ և 38 բրոնզե մետաղադրամ։

Ցուխտրիգելի խոսքով՝ դրամն ու անձնական իրերը թողնելը կարող է վկայել, որ տերերը ստիպված են եղել հապշտապ փախչել ժայթքումից։

Կապարե կշռաքարերը փոքր փայտե տուփի սակավաթիվ մնացորդների մեջ էին։ Պարկի մասնագետների խոսքով՝ դրանք կարող են առևտրային գործունեության մասին վկայել, սակայն դրանց կոնկրետ նշանակությունը դեռ պետք է գնահատել՝ հաշվի առնելով գտածոյի տեղն ու դրանց հետ հայտնաբերված մյուս առարկաները։